بارہمولہ/۵نومبر
جموں کشمیر کے لیفٹیننٹ گورنر منوج سنہا نے منگل کو کہا کہ دہشت گردوں کو پناہ دینے والوں کے گھروں کو زمین بوس کر دیا جائے گا۔
سنہا نے کہا کہ معصوم لوگوں کی زندگیاں چھیننے والے عناصر کو سزا دیے بغیر نہیں چھوڑا جائے گا۔
شمالی کشمیر کے بارہمولہ میں ایک تقریب سے خطاب کرتے ہوئے لیفٹیننٹ گورنر منوج سنہا نے کہا کہ اگر کوئی دہشت گردوں کو پناہ فراہم کرے گا تو اس کے گھر کو زمین بوس کردیا جائے گا اور حکومت کی جانب سے اس میں کوئی سمجھوتہ نہیں کیا جائے گا۔
ایل جی نے کہا کہ بے گناہ لوگوں کی زندگیاں چھیننے والوں کو سزا دیئے بغیر نہیں جانے دیا جانا چاہئے۔
کسی کا نام لیے بغیر ایل جی سنہا نے کہا کہ کچھ لوگ ایسے بیانات دیتے ہیں جو انصاف کے خلاف ہیں۔ انہوں نے کہا کہ کچھ لوگ بیان دیتے ہیں کہ دہشت گردوں اور ان کے ہمدردوں کے خلاف سخت کارروائی کرتے ہوئے ناانصافی کی جارہی ہے۔ ”میرا ماننا ہے کہ یہ انصاف کا مطالبہ ہے، یہ ہو رہا ہے اور یہ مستقبل میں بھی جاری رہے گا“۔
سنہا نے کہا کہ جموں کشمیر کو ریاست کا درجہ ملنا اتنا ہی یقینی ہے جتنا مشرق سے طلوع ہونے والا سورج۔ایل جی نے کہا کہ اس وعدے کو پورا کرنے کےلئے کسی سیاسی کوشش یا وعدوں کی ضرورت نہیں ہے۔
ایل جی نے کہا کہ پارلیمانی اجلاس میں حکومت جو یقین دہانی کراتی ہے وہ اتنی ہی سچی ہے جتنی مشرق سے طلوع ہونے والا سورج۔
