دہشتگردی کے خطرات کیخلاف پیشگی کارروائی کی ہدایت

ہمارا مقصد سماجی و اقتصادی ترقی کو یقینی بنانا اور لوگوں میں تحفظ کے احساس کو فروغ دینا ہے:سنہا
سرینگر//
لیفٹیننٹ گورنر ‘منوج سنہا نے دہشت گردی کے خطرات کے خلاف پیشگی کارروائی کی ہدایت دی ہے ۔
لیفٹیننٹ گورنرنے آج سرینگر میں کشمیر ڈویڑن کے تمام اضلاع کی سلامتی کی صورتحال اور ترقیاتی پہلوؤں پر ایک جائزہ اجلاس منعقد کیا۔
لیفٹیننٹ گورنر نے سیکورٹی گرڈ کے کام کاج کا جائزہ لیا اور تمام متعلقہ عہدیداروں کو دہشت گردی کے خطرات کے سلسلے میں پیشگی کارروائی کرنے کی ہدایت کی۔
سنہا کاکہنا تھا’’ہمیں امن اور ترقی کی رفتار کا تحفظ کرنا ہوگا۔ اس کے ساتھ ساتھ دہشت گردوں اور دہشت گردوں کو مدد، محفوظ پناہ گاہیں یا کسی بھی قسم کی مدد فراہم کرنے والوں کے خلاف سخت ترین اقدامات کرنے کی ضرورت ہے۔ ہمارا مقصد سماجی و اقتصادی ترقی کو یقینی بنانا اور لوگوں میں تحفظ کے احساس کو فروغ دینا ہے‘‘۔
ایل جی نے اس بات پر بھی زور دیا کہ ملک مخالف پراپیگنڈا پھیلانے والوں کے خلاف سخت کارروائی کی جانی چاہئے ، جو عوامی سلامتی اور امن و امان کے لئے خطرہ ہیں‘‘۔
لیفٹیننٹ گورنر نے دہشت گردی کے ماحولیاتی نظام کو کچلنے کے لئے زیرو ٹالرنس نقطہ نظر اور سیکورٹی ایجنسیوں کے درمیان زیادہ نگرانی اور کوآرڈینیشن پر زور دیا۔
سنہانے کہا کہ نارکو ٹیررازم کے مسئلے سے فوری طور پر نمٹا جانا چاہئے اور پورے نارکو ٹیرر نیٹ ورک کو ختم کرنے کو اولین ترجیح دی جانی چاہئے۔
تیز رفتار ترقی کی ضرورت پر زور دیتے ہوئے لیفٹیننٹ گورنر نے ڈپٹی کمشنروں کو ہدایت دی کہ وہ کسانوں کی فلاح و بہبود ، دیہی اور شہری ترقی ، خود روزگار اور مرکزی شعبے کی اسکیموں کے تحت اہم اقدامات کی تکمیل کیلئے اسکیموں کے کام کاج کی نگرانی کریں۔ انہوں نے عہدیداروں کو دور دراز علاقوں میں سڑک اور ٹیلی کام رابطے کو بہتر بنانے پر توجہ مرکوز کرنے کی بھی ہدایت کی۔
لیفٹیننٹ گورنر نے انتخابات اور شری امرناتھ جی یاترا کے پرامن انعقاد کیلئے جموں و کشمیر پولیس اور انتظامی اداروں کی ستائش کی۔
واضح رہے کہ جموںکشمیر میں گزشتہ ایک ہفتے کے دوران ملی ٹینٹ حملوں میں غیر معمولی اضافہ ہوا ہے ۔ گگن گیر سونہ مرگ اور گلمرگ میں ہوئے خونین حملوں کے بعد کشمیر کی سیکورٹی صورتحال کا از سر نو جائزہ لیا جارہا ہے ۔
چیف سکریٹری اٹل ڈولو، ڈی جی پی نلن پربھات،پرنسپل سکریٹری داخلہ چندرکر بھارتی، اے ڈی جی پی (لاء اینڈ آرڈر) وجے کمار۔ اے ڈی جی پی، سی آئی جناب نتیش کمار، لیفٹیننٹ گورنر کے پرنسپل سکریٹری مندیپ بھنڈاری، ڈویڑنل کمشنر، کشمیروجے بدھوری، کشمیر کے آئی جی ودھی کمار بردی کے علاوہ اجلاس میں کشمیر ڈویڑن کے تمام اضلاع کے ڈی آئی جیز، ڈی سیز اور ایس ایس پیز نے شرکت کی۔