جیل میں بند سرجن برکاتی نے بھی کاغذات نامزدگی داخل کئے

سرینگر//
جنوبی ضلع شوپیاں سے تعلق رکھنے والے محبوس مذہبی رہنما سرجا ن برکاتی نے بھی آزاد امیدوار کی حیثیت سے پرچہ نامزدگی داخل کئے ۔
بتادیں کہ سرجان برکاتی دہشت گردی فنڈنگ کیس کے ایک معاملے میں اس وقت پابند سلاسل ہے ۔
اطلاعات کے مطابق جیل میں بند سرجان برکاتی کی بیٹی نے منگل کے روز ڈی سی آفس شوپیاں میں والد کے کاغذات نامزدگی داخل کئے ۔
اس موقع سرجان برکاتی کی بیٹی نے کہا’’پہلے میرے والد کی گرفتاری عمل میں لائی گئی اور اس کے بعد ماں کو بھی سلاخوں کے پیچھے دھکیل دیا گیا‘‘۔انہوں نے کہاکہ مجھے شوپیاں کے لوگوں سے پوری امید ہے کہ وہ سرجان برکاتی کے حق میں اپنے ووٹ کا استعمال کریں گے ۔
ان کا مزید کہنا تھا کہ بطور آزاد امیدوار زینہ پورہ حلقے سے کاغذات نامزدگی داخل کئے ہیں۔
محبوس مذہبی رہنما کی بیٹی نے کہا’’ہمارے ساتھ ظلم و زیادتی ہوئی اب لوگوں کے پاس یہ موقع ہے کہ وہ سرجان برکاتی کی رہائی کی خاطر ووٹ کا استعمال کریں ‘‘۔
واضح رہے کہ سرجان برکاتی اُس وقت سوشل میڈیا پر وائرل ہوئے جب سال۲۰۱۶میں برہان وانی کی ہلاکت کے بعد اُس نے جنوبی کشمیر میں متعدد ریلیوں کی قیادت کی۔
یکم اکتوبر۲۰۱۶کو سرجان برکاتی کی گرفتاری عمل میں لائی گئی اور بعد ازاں ۲۰۲۰کو اس سے رہا کیا گیا۔
گزشتہ سال سٹیٹ انوسٹی گیشن ایجنسی نے دہشت گردی فنڈنگ کیس کے ایک معاملے میں سرجان برکاتی کو پھر گرفتار کیا اور بعد ازاں اُن کی اہلیہ کو بھی حراست میں لیا گیا ۔