’کانگریس کے ساتھ گٹھ جوڑ کے فیصلے پرمطمئن ہوں‘

سرینگر//
نیشنل کانفرنس کے صدر اور سابق وزیر اعلیٰ‘ ڈاکٹر فاروق عبداللہ نے کانگریس کے ساتھ گٹھ جوڑ کے حتمی فیصلے پر اطمینان کا اظہار کرتے ہوئے کہا کہ نیشنل کانفرنس، کانگریس اتحاد کامیاب ہو کر یہاں سرکار بنائے گا۔
فاروق نے کہا کہ دفعہ۳۷۰کی بحالی کیلئے سو سال بھی لگ جائیں ہم اس کیلئے کوشاں رہیں گے ۔
این سی صدر نے ان باتوں کا اظہار منگل کو جنوبی کشمیر کے ضلع پلوامہ میں نامہ نگاروں کے ساتھ بات کرنے کے دوران کیا۔
سابق وزیر اعلیٰ نے کہا’’گٹھ جوڑ میں کئی چیزوں کو برداشت کرنا پڑتا ہے کچھ چیزیں لینا پڑتی ہیں تو کچھ چیزوں کو دینا پڑتا ہے ‘‘۔
فاروق کا کہنا تھا’’ہمیں خوشی ہے کہ کانگریس کے ساتھ گٹھ جوڑ کا جو حتمی فیصلہ ہوا وہ بہت اچھا ہوا ۔انشاء اللہ اتحاد کامیاب ہوگا اور یہاں سرکار بنے گی اور لوگوں کے مشکلات کو حل کرنے کی کوشش کی جائے گی‘‘۔
کانگریس کے ساتھ کچھ سیٹوں پر دوستانہ مقابلے کے متعلق پوچھے جانے والے ایک سوال کے جواب میں فاروق نے کہا’’گھبرانے کی کوئی بات نہیں ہے ہمیں لوگوں پر پوری امید ہے‘‘۔
دفعہ۳۷۰کی بحالی کے بارے میں پوچھے جانے والے ایک سوال کے جواب میں این سی صدر کا کہنا تھا’’کیا ہم سمجھتے تھے کہ ہندوستان کبھی آزاد ہوگا کیوں نہ سو سال لگ جائیں گے لیکن یہاں کے لوگوں کی امیدیں پوری ہوں گی‘‘۔
بتادیں کہ نیشنل کانفرنس اور کانگریس کے درمیان پیر کے روز قبل ازانتخابات اتحاد کو حتمی شکل دے دی گئی۔
فارمولہ کے تحت نیشنل کانفرنس جموں وکشمیر کی۵۱؍اورکانگریس۳۲سیٹوں پر متحدہ طورپر الیکشن لڑیں گی جبکہ پانچ نشستوں پر دوستانہ مقابلہ ہوگا۔ ہرش دیو سنگھ کی پنتھرس پارٹی اورسی پی آئی ایم کو بالترتیب ایک ایک نشست دے دی گئی۔