لداخ میں ایل اے سی سے متصل گاؤں کو ۴ جی نیٹ ورک مل گیا

لیہہ//
لداخ میں لائن آف ایکچوئل کنٹرول (ایل اے سی) سے متصل ایک دور افتادہ گاؤں کو چہارشنبہ کے روز۴ جی موبائل نیٹ ورک خدمات تک رسائی حاصل ہوگئی، یہ پیش رفت مقامی انتظامیہ اور ہندوستانی فوج کی مشترکہ کوششوں سے ممکن ہوئی ہے۔
ایک سرکاری ترجمان نے بتایا کہ ایئرٹیل فور جی نیٹ ورک کا افتتاح فوبرنگ گاؤں میں چوشول کونسلر کونچوک اسٹینزن اور ۱۱۸ بریگیڈ کے بریگیڈیئر ایس رانا نے دیگر عہدیداروں کے ساتھ کیا۔
ترجمان نے کہا کہ یہ خدمت مقامی انتظامیہ، فوج، دیہاتیوں اور کونسلر کی مشترکہ کوششوں سے ممکن ہوئی ہے۔
ترجمان نے کہا کہ کونسلر اسٹینزن نے نیٹ ورک ٹاور کو بجلی فراہم کرنے کے لیے سولر پلانٹ فراہم کیا، بھارتی فوج نے پانچ کلومیٹر آپٹیکل فائبر کیبل (او ایف سی) بچھائی، دیہاتیوں نے بیٹری بینک تعمیر کیا اور ایئرٹیل نے ٹاور نصب کیا۔
کونسلر اسٹینزن نے کہا’’اس منصوبے کو حقیقت کا روپ دینے میں شامل ہر شخص کا تہہ دل سے شکریہ ادا کرتا ہوں۔ ڈپٹی کمشنر کی غیر متزلزل حمایت، فائر اینڈ فیوری کور کو پانچ کلومیٹر او ایف سی فراہم کرنے اور ایئرٹیل کے ۴جی نیٹ ورک کو اس دور دراز سرحدی گاؤں تک پھیلانے کے عزم کے لئے ٹیم کا خصوصی شکریہ۔ انتہائی دور دراز علاقوں میں رابطہ کاری لانے کیلئے آپ کی کوششیں انتہائی قابل ستائش ہیں‘‘۔
ترجمان نے بتایا کہ فوبرانگ کے دیہاتیوں نے آخر کار۴ جی موبائل نیٹ ورک خدمات حاصل کرنے پر بے حد خوشی اور شکریہ کا اظہار کیا۔