خود کشی کے واقعات کی روک تھام شہر کے پلوں پر باڑ لگانا شروع

سرینگر//
سرینگر انتظامیہ نے ضلع میں خودکشی کے واقعات کی روک تھام کیلئے شہر کے مختلف بڑے پلوں کے اطراف باڑ لگانے کا کام شروع کردیا ہے۔
ڈپٹی کمشنر سرینگر ڈاکٹر بلال محی الدین بٹ نے کہا کہ سرینگر شہر میں مختلف پلوں کے اطراف باڑ لگانے کا عمل شروع کردیا گیا ہے تاکہ قیمتی انسانی جانوں کو بچایا جاسکے۔
ڈپٹی کمشنر نے کہا کہ باڑ لگانے کے حوالے سے ڈی پی آر تیار کر لیا گیا ہے اور نوا کدل اورفتح کدل پل کے اطراف میں باڑ لگانے کے لیے ۱۹ لاکھ روپے مختص کیے گئے ہیں۔
اسی طرح گاؤ کدل پل کے لئے ۹ لاکھ روپے اور صفاکدل پل کے لئے ۲۹ لاکھ روپے کا ڈی پی آر تیار کیا گیا ہے۔
جبکہ قمرواری میں دریائے جہلم پر نور جہاں پل کے اطراف باڑ لگانے کا کام ۱۱ لاکھ روپے کی لاگت سے مکمل کیا جائے گا تاکہ مزید کسی حادثے یا خودکشی کے واقعے سے بچا جا سکے۔
یاد رہے کہ بدھ کو حبہ کدل میں ایک دوشیزہ نے جہلم میں چھلانگ لگا کر اپنا کام تمام کیا ۔