شوپیاں میں منشیات فروشوں کی کروڑوں روپے مالیت کی جائیدادیں قرق

سرینگر//
پولیس نے جنوبی ضلع شوپیاں میں بد نام زمانہ منشیات فروشوں کی کروڑوں روپیہ مالیت کی غیر منقولہ جائیدادوں کو قرق کر دیا ہے ۔
پولیس کے ایک ترجمان نے بتایا کہ ایس ایس پی شوپیاں کی سربراہی میں پولیس ٹیم نے یعقوب شاہ ولد سلطان شاہ اور عادل حسین شاہ ولد محمد یعقوب شاہ ساکنان راولپورہ شوپیاں کی جائیداد کو ضبط کیا ہے ۔
ترجمان نے کہاکہ قرق شدہ جائیداد میں پالپورہ شوپیاں میں دو کنال اراضی، چودھری گنڈ شوپیاں میں ایک کنال اٹھارہ مرلہ اراضی اور ہر گام شوپیاں میں ایک دکان شامل ہے ۔انہوں نے کہا کہ یہ کارروائی پولیس اسٹیشن میں درج ایک مقدمے میں این ڈی پی ایس ایکٹ کی متعلقہ دفعات کے تحت انجام دی گئی۔
پولیس ترجمان نے کہا کہ تحقیقات کے دوران جائیداد کی شناخت غیر قانونی طور حاصل شدہ جائیداد کے طور پر ہوئی ہے ۔
ترجمان کا کہنا تھا’’یہ جائیداد پہلی نظر میں منشیات فروش کی طرف سے نشہ آور اور ادویات اور سائیکو ٹراپک مواد کی غیر قانونی اسمگلنگ سے حاصل کی گئی تھی۔‘‘
دریں اثناپولیس نے وسطی کشمیر کے ضلع بڈگام میں ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے ۔
گرفتار شدہ منشیات فروش کی شناخت راج سنگھ ولد گوپی چند ساکن اگہار جتو پونگھٹ اودھم پور کے طور پر کی گئی ہے ۔
ایک پولیس ترجمان نے اس سلسلے میں تفصیلات فراہم کرتے ہوئے کہا کہ پولیس پوسٹ ہمہامہ کو ائیر پورٹ سری نگر پر قائم سی آر پی ایف کی ۳۵ویںبٹالین کے او سی ڈراپ گیٹ سے ایک خط موصول ہوا جس میں کہا گیا کہ ایک شخص مشکوک حالت میں گھوم رہا ہے ۔
ترجمان نے کہا کہ ابتدائی تفتیش کے دوران اس نے اپنی شناخت راج سنگھ ولد گوپی چند ساکن اگہار جتو پونگھٹ اودھم پور کے طور پر ظاہر کی۔
بیان میں کہا گیا کہ تلاشی کے دوران اس کی تحویل سے قریب۹۶ء۲گرام فکی بر آمد کی گئی اور اس جرم کے ارتکاب کیلئے استعمال کی جانے والی ایک گاڑی بھی ضبط کی گئی۔انہوں نے کہا کہ مذکورہ منشیات فروش کو بر سر موقع ہی گرفتار کیا گیا۔
ان کا کہنا تھا کہ اس سلسلے میں پولیس اسٹیشن بڈگام میں این ڈی پی ایس کے متعلقہ دفعات کے تحت ایک کیس درج کرکے مزید تحقیقات شروع کی گئی۔