این سی ورکروں کو گرفتار کرنے کی دھمکیاں دی جارہی ہیں:فاروق

سرینگر//
جموںکشمیر نیشنل کانفرنس کے صدر ڈاکٹر فاروق عبداللہ نے ہفتے کو کہا کہ ہمارے ورکروں پر مختلف طریقوں سے دباؤ ڈالا جارہاہے اور گرفتار کرنے کی دھمکیاں دی جارہی ہیں۔ ’’میں حکومت اور انتظامیہ کر خبردار کرتا ہوں کہ اس رویہ سے اجتناب کریں ‘‘۔
ڈاکٹر فاروق نے کہا کہ جموں کشمیر کے عوام کو زیر کرنے کی کوشش عروج پر اور اس گناہ کبیرہ کو انجام دینے کیلئے یہاں کے چند خودغرض اور ضمیر فروش سیاسی عناصر کو اکٹھا کرکے ریاستی عوام کے عزائم کو شکست دینے کوشش کی جارہی ہے ۔
این سی صدر نے ان باتوں کا اظہار سرینگر اور پانپور میں چناوی ریلیوں سے خطاب کے دوران کیا۔
ڈاکٹر فاروق عبداللہ نے کہا کہ رواںپارلیمانی انتخابات نے ریاستی عوام کو ایک سنہری موقع فراہم کیا ہے کہ وہ بلا لحاظ مذہب و فرقہ کے متحد ہوکر ان بددیانت ، بے ضمیر اور عوام دشمن طاقتوںکو منہ توڑ جواب دیں۔انہوں نے کہا’’ یہ لوگ پہلے ہی عوام میںبدنام اور نشان زدہ ہیں۔ عوام کو معلوم ہے کہ ان کی چابی کہاں گمائی جاتی ہے اور ان کو متحدہ کرکے ریاستی عوام کو خوفزدہ اور پسپا کرنے کی کوشش کی جارہی ہے ‘‘۔
سابق وزیر اعلیٰ نے کہا کہ یہاں چند مفاد پرست لوگ ریاست دشمن اور عوام دشمن طاقتوں کے آلہ کار بن کر ذاتی دولت اور وقار کا تحفظ کرنے کی غرض سے ریاستی عوام کی تذلیل اور تحقیر کرنے پر تلے ہوئے ہیں۔
اس سے قبل حضرتبل کے اجتماع سے خطاب کرتے ہوئے کہا’’ہمارے مخالفین نیشنل کانفرنس کے تئیں عوامی جوش و جذبے سے بوکھلاہٹ کے شکار ہوگئے ہیں اور اب بی جے پی یہاں اے بی سی اور ڈی ٹیموں کی مدد کیلئے انتظامیہ کا سہارا لے رہی ہے ‘‘۔
سابق وزیر اعلیٰ نے کہا’’ہمارے ورکروں پر مختلف طریقوں سے دباؤ ڈالا جارہاہے اور گرفتار کرنے کی دھمکیاں دی جارہی ہیں۔ میں حکومت اور انتظامیہ کر خبردار کرتا ہوں کہ اس رویہ سے اجتناب کریں ۔‘‘