گاندربل میں آتشزدگی میں۱۳دکانوں کو نقصان

سرینگر//
وسطی کشمیر کے ضلع گاندربل کے مرکزی بازار بیہامہ میں دوران شب آگ کی ایک واردات میں کم سے کم ۱۳دکانوں کو نقصان پہنچا ہے ۔
محکمہ فائر اینڈ ایمرجنسی کے ایک عہدیدار نے بتایا کہ گاندربل کے مرکزی بازار بیہامہ میں دوران شب ایک بریانی ہٹ سے آگ نمودار ہوئی جس کے شعلوں نے متصل واقع ایک شاپنگ کمپلیکس اور ایک عمارت کو اپنی لپیٹ میں لے لیا۔
عہدیدار نے کہا کہ آگ کی اس واردات میں کم سے کم۱۳دکانوں کو نقصان پہنچا۔ان کا کہنا تھا کہ اطلاع موصول ہوتے ہی۶فائر ٹنڈرس کو جائے واردات پر روانہ کیا گیا اور آگ کو قابو میں کر لیا گیا۔
عہدیدار نے بتایا کہ آگ لگنے کی وجہ معلوم کی جا رہی ہے تاہم اس واردات میں کسی جانی نقصان کی کوئی اطلاع نہیں ہے ۔
دریں اثنا پولیس نے اس سلسلے میں کیس درج کرکے تحقیقات شروع کی ہے۔