’بی جے پی پوری طاقت کے ساتھ حکومت بنائیگی‘

سرینگر///
بھارتیہ جنتاپارٹی(بی جے پی) کے جموںکشمیر یونٹ کے صدر رویندر رینا نے جمعے کے روز کہاکہ اس وقت پورے ملک میں مودی کی لہر چل رہی ہے ۔
رینا نے کہاکہ بی جے پی تیسری مرتبہ مرکز میں حکومت بنانے میں کامیاب ہو جائے گی ۔
بی جے پی یونٹ صدر نے دعویٰ کیا کہ اسمبلی انتخابات میں وادی کشمیر میں بھی کنول کا پھول کھلے گا ۔
ان باتوں کا اظہار رینانے کپواڑہ میں نامہ نگاروں سے بات چیت کے دوران کیا۔
رینا نے کہاکہ بھارتیہ جنتاپارٹی کو جموں وکشمیر کے ساتھ ساتھ پورے ملک میں لوگوں کی حمایت حاصل ہے ۔انہوںنے کہاکہ اس وقت پورے ملک میں مودی جی کی لہر ہے اور یہ کہ بھاجپا تیسری مرتبہ مرکز میں حکومت تشکیل دینے میں کامیاب ہو جائے گی۔
ان کے مطابق بی جے پی نے چار سو پار کا نعرہ دیا ہے اور ہمیں پوری امید ہے کہ اس مشن میں ہم کامیاب ہو جائیں گے ۔
بی جے پی یونٹ صدر نے ڈاکٹرفاروق عبداللہ اور عمر عبداللہ کو تنقید کا نشانہ بناتے ہوئے کہاکہ این سی اقتدار کی بھوکی ہے ۔
اسمبلی چناو کے بارے میں پوچھے گئے سوال کے جواب میں رینا نے کہا’’اسمبلی انتخابات میں بی جے پی سرکار بنانے میں کامیاب ہو جائے گی اور وادی کشمیر میں ہر طرف کنول کا پھول کھلے گا‘‘۔
رینا نے کہاکہ بی جے پی وادی کشمیر میں سب سے مضبوط ترین سیاسی جماعت ہے ۔انہوں نے کہاکہ کشمیر کے ہر گاوں میں بی جے پی کا تنظیمی نیٹ ورک ہے ، ہزاروں کی تعداد میں ہمارے سرگرم ورکر ہیں اور لاکھوں کی تعداد میں وادی میں ہماری ممبر شپ ہے ۔