نہیں صاحب ہم کسی پر کوئی الزام عائد نہیں کررہے ہیں… ہمیں کسی کی نیت پر بھی شک نہیں ہے… لیکن … لیکن صاحب کچھ باتیں‘ کچھ حقائق ایسے ہیں جو کسی بات کی چغلی کھاتے ہیں… اس ایک بات کی کہ … کہ کیا واقعی میں سرینگر کا عید گاہ نماز عید ادا کرنے کے قابل نہیں ہے ‘ جیسا کہ کہا جا رہا ہے؟کسی کابینہ کے بغیر ہی خود کو وزیر مملکت کہنے اور سمجھنے والی درخشان اندرابی صاحبہ کاکہنا ہے کہ عید گاہ میں نماز عید اس لئے ادا نہیں کی جا سکتی ہے کیونکہ اسے کھیل کے میدان میں تبدیل کیا گیا ہے… پچھلے سال اندرابی صاحبہ کاکہنا تھا کہ نماز عید اس لئے ادا نہیں کی جا سکتی ہے کیونکہ موسم … خراب موسم اس بات کی اجازت نہیں دیتا ہے … محترمہ کا کہنا ہے عید گاہ کو نماز عید کے قابل بنانے کیلئے بہت وقت لگے گا … ہو سکتا ہے کہ ایسا ہی ہو لیکن… لیکن اگر ایسا ہی ہے اور… اور عید گاہ کو نماز عید کے قابل بنانے میں وقت لگے گا تو…تو کیا اس ضمن میں اب تک کیا گیا ہے ؟نماز عید کے قابل بنانے کیلئے کون سا تعمیری کام ہاتھ میں لیا گیا ہے … عید گاہ کی دیکھ بال کی ضرورت کی بات صرف عید کے موقع پر ہی کیوں جا تی ہے… جبکہ سال کے باقی گیارہ ساڑھے گیارہ ماہ مکمل خاموشی اختیار کی جا تی ہے… یقیناعید گاہ میں کھیل کود کی سرگرمیاں ہو رہی ہیں… بچے وہاں کھیل رہے ہیں…انہوں نے عید گاہ کو کھیل کے میدان میں تبدیل کیا ہے… لیکن… لیکن ماضی قریب میں جب وہاں عید کے بڑے اور عظیم الشان اجتماعات ہو تے تھے تو… تو کیا اس وقت عید گاہ میں کوئی کھیل کود نہیں ہو تا تھا… کیا تب بچے وہاں کھیلتے نہیں تھے؟کیا عید گاہ کو اب کھیل کے میدان میں تبدیل کیا گیا ہے ؟جواب آپ بھی جانتے ہیں اور… اور ہم بھی … اسی طرح جس طرح آپ اور ہم اس بات کو بھی جانتے ہیں…کہ آخر عید گاہ میں نماز عید کی ادائیگی کیوں ممکن نہیں بنائی جا رہی ہے … جبکہ اسے ممکن بنانا کوئی بڑی بات نہیں ہے اور… اور اندرابی صاحبہ جو وجوہات بتا رہی ہیں… اللہ میاں کی قسم وہ کوئی وجہ نہیں ہے… نماعید کی ادانہ کرنے کی کوئی وجہ نہیں ہے اور… اور اندرابی صاحبہ بھی یہ بات جانتی ہیں… لیکن مانتی نہیں ہیں… بالکل بھی نہیں ہیں۔ ہے نا؟
