کپوارہ میں خاتون سمیت تین منشیات فروش گرفتار:پولیس

سرینگر/18مئی
معاشرے سے منشیات کی وبا کی بیخ کنی کو یقینی بنانے کیلئے مہم کو جاری رکھتے ہوئے پولیس نے شمالی کشمیر کے ضلع کپوارہ میں ایک خاتون سمیت تین منشیات اسمگلروں کو گرفتار کرکے ان کی تحویل سے ممنوعہ اشیا کے علاوہ زائد از ساڑھے پانچ لاکھ روپیے نقدی بر آمد کئے ہیں۔
ایک پولیس ترجمان نے تفصیلات فراہم کرتے ہوئے کہا کہ ایک مصدقہ اطلاع پر کارروائی کرتے ہوئے پولیس نے کپوارہ کے دیور لولاب علاقے میں ایک شخص کو گرفتار کیا۔انہوں نے کہ مذکورہ شخص کی تحویل سے تلاشی کے دوران۱۲کلو چرس جسیا مواد اور۵لاکھ ۶۰ہزار روپیے نقدی بر آمد کئے گئے ۔
گرفتاد شدہ منشیات اسمگلر کی شناخت محمد شفیع گوجری کے بطور ہوئی ہے ۔
پولیس نے اس ضمن میں ایک کیس درج کرکے مزید تحقیقات شروع کی ہیں۔
پولیس ترجمان نے بتایا کہ کپوارہ میں ہی پولیس اور فوج نے لائن آف کنٹرول(ایل او سی) گیٹ کے نزدیک معمول کی چیکنگ کے دوران ایک خاتون اور اس کے ساتھی سے براؤن شوگر کے دو پاکیٹ بر آمد کئے اور دونوں کو حراست میں لیا گیا۔ان کی شناخت گلہ بیگم زوجہ رشید خان ساکن دادر کنڈیان اور تنویر خان ولد نصیر خان ساکن کنڈیان کے بطور ہوئی ہے ۔
ترجمان نے کہا کہ دونوں نے ایل او سی گیٹ کھیتی باڑی کرنے کے بہانے پر پار کیا لیکن جب وہ واپس لوٹے تو ان کی تحویل سے منشیات کے دو پاکیٹ بر آمد کئے گئے جن کا وزن۷۵ء۱گرام ہے ۔
ان کا مزید کہنا تھا کہ دونوں کی گرفتاری عمل میں لائی گئی ہے اور اس سلسلے میں مزید تحقیقات شروع کی گئی ہے ۔