وزیر اعظم سرینگر میں:پولیس اور سیول انتظامیہ کے سینئر عہدیداروں کی میٹنگیں

سرینگر//
وزیر اعظم نریندر مودی کے دورے کشمیر کے پیش کے نظر سیکورٹی انتظامات کا جائزہ لینے کی خاطر پولیس ، فوج ، سی آر پی ایف کے سینئر آفیسران کے ساتھ ساتھ سیول انتظامیہ سے وابستہ عہدیداروں کی اعلیٰ سطحی میٹنگیں منعقد ہوئیں۔
معلوم ہوا ہے کہ ان اعلیٰ سطحی میٹنگوں کے دوران سیکورٹی صورتحال کا جائزہ لیا گیا۔
ذرائع نے بتایا کہ پی ایم مودی کے دورے کشمیر کو مد نظر رکھتے ہوئے بدھ کی شام کو پولیس ، فوج اور سی آر پی ایف کے سینئر آفیسران کی ایک اعلیٰ سطحی میٹنگ منعقد ہوئی۔
ذرائع نے بتایا کہ میٹنگ کے دوران وزیر اعظم نریندر مودی کے سرینگر دورے کے پیش نظر سیکورٹی منظر نامے کا تفصیلی جائزہ لیا گیا۔انہوں نے بتایا کہ اس اعلیٰ سطحی میٹنگ کے دوران شہر بھر میں ناکوں کا جال بچھانے اور ڈرون و سی سی ٹی کیمروں کے ذریعے مشکوک نظر آنے والے افراد پر نظر گزر رکھنے کے بھی احکامات صادر کئے گئے ہیں۔
ذرائع نے بتایا کہ بخشی اسٹیڈیم سرینگر میں بدھ شام دیر گئے پولیس سربراہ اور سیول انتظامیہ سے وابستہ سینئر آفیسران نے انتظامات کا جائزہ لیا۔
ان کے مطابق چیف سیکریٹری اتل کمار ڈھلو کی سربراہی میں بھی سیول انتظامیہ سے وابستہ آفیسران نے انتظامات کا بچشم جائزہ لے کر ضلعی آفیسران کے ساتھ گفت وشنید کی۔انہوں نے کہاکہ بخشی اسٹیڈیم کے اردگرد قائم اونچی عمارتوں پر شارپ شوٹرس بھی تعینات کئے گئے ہیں۔
ادھرمودی کے دورے کے پیش نظر دریائے جہلم میں مارین کمانڈوز کی تعیناتی عمل میں لائی گئی ہے ۔
ذرائع نے بتایا کہ وزیرا عظم نریندر مودی کے دورے سرینگر کے پیش نظر سیکورٹی کے سخت ترین انتظامات کئے گئے ہیں۔
معلوم ہوا ہے کہ بدھ کے روز مارین کمانڈوز کو دریائے جہلم میں تعینات کیا گیا ۔
ذرائع کے مطابق ڈلگیٹ سے لے کر زیرو برج تک مارین کمانڈوز کو خصوصی بوٹوں میں تعینات کیا گیا ہے ۔انہوں نے بتایا کہ مشکوک نظر آنے والے افراد پر نظر گزر رکھی جارہی ہے۔