خرام موسم:وادی کا ملک کے ساتھ زمینی رابطہ منقطع

سرینگر//
وسیع پیمانے پر برف وباراں کے باعث وادی کشمیر کا ملک کے باقی حصوں کے ساتھ منگل کو بھی زمینی رابطہ منقطع رہا۔
ٹریفک حکام کے مطابق جہاں وادی کو ملک کے ساتھ جوڑنے والی سرینگر جموں قومی شاہراہ مٹی کے تودے گر آنے کی وجہ سے بند ہے وہیں سرینگر، لیہہ شاہراہ اور اور تاریخی مغل روڈ بھی برف جمع ہونے کی وجہ سے ٹریفک کیلئے بند ہے ۔
ٹریفک حکام نے بتایا کہ دلواس، پیر ہا، مہاد، کیفٹیریا، جیسوال برج، ترشول موڑ، سیری، ٹی ٹو، مونکی موڑ، موم پاسی، گنگرو،ہنگنی مروگ، کشتواڑی پتھرچلواس پر پتھر کھسک آنے کی وجہ سے سرینگر، جموں قومی شاہراہ پر ٹریفک بند ہے ۔انہوں نے لوگوں سے قومی شاہراہ پر سفر کرنے سے پرہیز کرنے کی صلاح دی ہے ۔ان کا کہنا ہے کہ لوگ موسم بہتر ہونے سے قومی شاہراہ پر سفر نہ کریں اور اس سلسلے میں متعلقہ ٹریفک کنٹرول یونٹوں کے ساتھ رابطہ کریں۔
ادھر جنوبی کشمیر کے ضلع شوپیاں کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ پر گذشتہ کئی روز سے ٹریفک بند ہے جبکہ سرینگر، لیہہ شاہراہ پر بھی برف جمع ہونے کی وجہ سے ٹریفک کی نقل و حمل بند ہے ۔
علاوہ ازیں بھدر واہ، چمبا روڈ اور کشتواڑ، سنتھن، اننت ناگ روڈ بھی ٹریفک کی نقل و حمل کیلئے بند ہیں۔
بتادیں کہ محکمہ موسمیات کی پیش گوئی کے مطابق وادی میں۲۱فروری کی دوپہر تک موسم خراب رہنے کا امکان ہے اور اس دوران بالائی علاقوں میں بھاری برف باری جبکہ میدانی علاقوں میں موسلا دھار بارشوں کو امکان ہے ۔
ادھر بھاری برف باری کے باعث منگل کے روز سری نگر ہوائی اڈے پر کئی پروازوں کو منسوخ کیا گیا۔
متعلقہ حکام نے بتایا کہ وادی میں جاری خراب موسمی صورتحال کے پیش نظر فلائٹ آپریشن کے مکمل طور پر معطل رہنے کا امکان ہے ۔
ائیر پورٹ اتھارٹی کے ایک عہدیدار نے بتایا کہ خراب موسمی صورتحال کی وجہ سے منگل کے روز سرینگر ہوائی اڈے پر کئی پروزاوں کو منسوخ کیا گیا۔انہوں نے کہا کہ انڈیگو اور اور دوسری کئی پراوزوں کو اسٹینڈ بائی موڈ پر رکھا گیا ہے اور بھاری برف باری کے پیش نظر فلائٹ آپریشن مکمل طور پر معطل رہنے کا امکان ہے ۔
بتادیں کہ وادی کے پہاڑی علاقوں کے ساتھ ساتھ سری نگر سمیت میدانی علاقوں میں بھی منگل کی صبح سے برف باری ہو رہی ہے اور محکمہ موسمیات کے مطابق برف باری کا یہ سلسلہ منگل کی رات دیر گئے تک جاری رہ سکتا ہے ۔
ادھر وادی کا ملک کے باقی حصوں کے ساتھ زمینی رابطہ بھی منقطع ہے ۔
ٹریفک حکام کے مطابق وادی کو ملک کے باقی حصوں کے ساتھ جوڑنے والی سرینگر، جموں قومی شاہراہ پر کئی مقامات پر چٹانیں کھسک آنے کی وجہ سے ٹریفک بند ہے وہیں مغل روڈ اور سرینگر‘لیہہ شاہراہ پر برف جمع ہونے کی وجہ سے ٹریفک کی نقل و حمل معطل ہے ۔