۵۰ دنوں کی سرمائی تعطیلات کے بعد ڈگری کالیج کھل گئے

سرینگر///
وادی کشمیر میں سرمائی تعطیلات ختم ہونے کے بعد کالجوں میں دوبارہ رونق لوٹ آئی اور درس و تدریس کی سرگرمیاں بھی شروع ہو گئیں۔
جنوبی کشمیر کے ضلع اننت ناگ کے زنانہ کالج میں سرمائی تعطیلات ختم ہونے کے بعد کالج عملہ نے طالبات کا والہانہ استقبال کیا۔
تقریباً دو ماہ تک بند رہنے کے بعد و طالبات کے کالجوں کا رخ کرنے سے ویمزن کالج اننت ناگ میں خوشگوار ماحول دیکھنے کو ملا۔ جہاں کالج پرنسپل کے ساتھ ساتھ اساتذہ نے بھی طلبا کا گرم جوشی سے استقبال کیا، وہیں طالبات کا اپنے ہم جماعت ساتھیوں کے ساتھ بغل گیر ہونے کے مناظر بھی دیکھنے کو ملے۔
طالبات کے ساتھ ساتھ کالج کے اساتذہ بھی کافی خوش نظر آئے۔ اساتذہ کا کہنا ہے کہ بچوں کو کلاسز میں روبرو پڑھائی کرتے ہوئے دیکھ کر انہیں بہت اچھا لگ رہا ہے۔
طالبات کا کہنا ہے کہ ’’اس سال موسم خوشگوار رہا اور ہم اس انتظار میں تھے کہ کب کالج کھلیں گے اور ہمیں پھر سے اپنے دوستوں اور اساتذہ سے ملنے کا موقع ملے گا۔‘‘
کالج کی پرنسپل نے کہا کہ درس وتدریس کی سرگرمیاں شروع کرنے سے قبل ہی کالج میں تمام تیاریوں کو حتمی شکل دی گئی تھی، تاکہ طالبات بنا کسی خلل یا پریشانی کے اپنے اپنے کلاسز میں دوبارہ پڑھائی شروع کر سکیں۔
یاد رہے کہ ایل جی انتظامیہ نے موسم سرما کے پیش نظر وادی کشمیر سمیت صوبہ جموں کے سرمائی زونز کے کالجز میں ۲۷ دسمبر ۲۰۲۳ سے۱۴فروری۲۰۲۴ تک تعطیلات کا اعلان کیا تھا۔ کشمیر کے سبھی ڈگری کالجز میں۴۹ دن کی سرمائی تعطیلات کے بعد درس و تدریس کی سرگرمیاں شروع ہوئیں۔
واضح رہے کہ کشمیر وادی میں کالجز میں تعلیمی سرگرمیاں شروع ہونے کے بعد اب اگلے ماہ یعنی یکم مارچ سے اسکولوں میں بھی تعلیمی سرگرمیاں شروع کی جائیں گی۔