’لوگ مضبوط تو ملک مضبوط ہوگا‘….. معاشرے کے آخری فرد تک پہنچ کرانہیں اسکیموں سے جوڑا جارہا ہے

نئی دہلی//
وزیر اعظم نریندر مودی نے عام آدمی کو روزمرہ کی ضروریات کیلئے جدوجہد سے باہر نکالنے کا ارادہ ظاہر کرتے ہوئے پیر کو کہا کہ غریب، کسان، خواتین اور نوجوان اگر یہ چار ذاتیں مضبوط ہوں گی، توہندوستان مضبوط ہوجائے گا۔
مودی نے یہاں وکست بھارت سنکلپ یاترا سے ویڈیو لنک کے ذریعے خطاب کرتے ہوئے کہا کہ دو تین دن پہلے ہی یاترا نے اپنے۵۰دن مکمل کیے ہیں۔ اس عرصے میں۱۱کروڑ لوگوں کا جڑنا، یہ اپنے آپ میں بے مثال ہے ۔ حکومت خود معاشرے کے آخری فرد تک پہنچ کر اسے اپنی اسکیموں سے جوڑ رہی ہے ۔
وزیر اعظم نے کہا’’وکست بھارت سنکلپ یاترا نہ صرف حکومت کی بلکہ ملک کے خوابوں کی، قراردادوں اور اعتماد کی یاترا بن گئی ہے اور یہی وجہ ہے کہ ملک کا ہر علاقہ، ہر خاندان اپنے بہتر مستقبل کی امیدکے طورپرمودی کی گارنٹی والی گاڑی دیکھ رہا ہے ۔ اس یاترا کے تعلق سے گاؤں ہو یا شہر، ہر جگہ امنگ ہے ، جوش اور یقین ہے ۔ ملک کے ہرکونے میں مودی کی گارنٹی والی گاڑی پہنچ رہی ہے ۔ جن غریب لوگوں کی زندگی سرکاری اسکیموں کا فائدہ حاصل کرنے کے انتظار میں گزر گئی، وہ آج ایک معنی خیز تبدیلی دیکھ رہے ہیں‘‘۔
مودی نے کہا’’ کس نے سوچا تھا کہ کبھی سرکاری ملازم، سرکاری افسر، یہ بابو اور یہ لیڈران خود غریب کے دروازے پر پہنچ کر پوچھیں گے کہ آپ کو سرکاری اسکیموں کا فائدہ ملا یا نہیں۔ لیکن اب یہ پوری ایمانداری کے ساتھ ہورہا ہے ۔ مودی کی گارنٹی والی گاڑی کے ساتھ، سرکاری دفتر،عوامی نمائندے ، ملک کے باشندوں کے پاس، ان کے گاؤں محلے پہنچ رہے ہیں‘‘۔
وزیر اعظم نے کہا’’آج ملک نہیں بلکہ دنیا میں مودی کی گارنٹی پر بات ہورہی ہے ، لیکن مودی کی گارنٹی کا مطلب کیا ہے ؟آخر اس طرح مشن موڈ پر ملک کے ہر استفادہ کنندہ تک حکومت کا پہنچنا یہ اتنی محنت کیوں کرتے ہیں؟ دن رات حکومت اپنی خدمات انجام دینے میں اتنی محنت کیوں کررہی ہے ؟ سرکاری اسکیموں کے مکمل نفاذ اور وکست بھارت کے عہد میں کیا تعلق ہے‘‘ ؟
مودی نے کہا’’ہمارے ملک میں بہت سی نسلوں نے سہولت کی کمی میں زندگی گزاری ہے ، ادھورے خوابوں کے ساتھ زندگی مکمل کی ہے ، انہوں نے اس کمی کو اپنی قسمت تسلیم کیا اور اسی غربت کی زندگی گزارنے کیلئے مجبور رہے ۔ چھوٹی چھوٹی ضروریات کے لیے یہ جدوجہد ملک میں غریبوں، کسانوں، خواتین اور نوجوانوں میں اس کا سب سے زیادہ اثر رہا۔ ہماری حکومت چاہتی ہے کہ موجودہ اور آنے والی نسلوں کو اس طرح کی زندگی نہ گزارنی پڑے ‘‘۔
وزیر اعظم نے مزید کہا’’ آپ کے آبا ؤ اجدادا کو جن پریشانیوں کا سامنا کرنا پڑا، آپ کے بزرگوں کو جو مشکلات جھیلنی پڑی، وہ پریشانی آپ کو نہ پیش آئے ، اسی مقصد کے لیے ہم اتنی محنت کر رہے ہیں۔ ہم ملک کی ایک بہت بڑی آبادی کو روزمرہ کی چھوٹی چھوٹی ضروریات کے لئے ہونے والی جدوجہد سے باہر نکالنا چاہتے ہیں۔ اس لیے ہم غریبوں، کسانوں، خواتین اور نوجوانوں کے مستقبل پر توجہ مرکوز کر رہے ہیں اور یہی ہمارے لیے یہ ملک کی سب سے بڑی چار ذاتیں ہیں۔ جب غریب، کسان، خواتیں اور نوجوان، یہ میری چار ذاتیں، جو میری پسندیدہ چار ذاتیں ہیں، اگر یہ مضبوط ہو ں گی، تو ہندوستان کا مضبوط ہونا یقینی ہو گا۔‘‘