جموں/۲۶دسمبر
جموں و کشمیر کے پونچھ میں گزشتہ ہفتے گھات لگا کر کئے گئے حملے میں ملوث دہشت گردوں کا سراغ لگانے کے لئے سیکورٹی فورسز نے منگل کو مسلسل چھٹے دن بھی محاصرے اور تلاشی کی کارروائی جاری رکھی۔
سرکاری ذرائع نے بتایا کہ وزیر دفاع راج ناتھ سنگھ بدھ کے روز پونچھ میں دہشت گردانہ حملے کے پیش نظر فوج اور سویلین حکام کے ساتھ گراو¿نڈ زیرو کا دورہ کریں گے۔
انہوں نے بتایا کہ گزشتہ چند دنوں کے دوران 30 سے زیادہ مشتبہ افراد سے پوچھ گچھ کی گئی ہے اور ان میں سے کئی کو رہا کر دیا گیا ہے۔
ایک سینئر افسر نے بتایا کہ فوج کی گاڑیوں پر گھات لگا کر حملہ کرنے والے دہشت گردوں کا سراغ لگانے کے لئے محاصرے اور تلاشی کی کارروائی جاری ہے۔
ادھر ایک عہدیدار نے بتایا کہ آپریشن میں سراغ رساں کتے، نگرانی کے آلات اور فضائی میکانزم شامل ہیں۔ انہوں نے کہا کہ علاقے میں تسلط کی کارروائیوں کے دوران دراندازی کے سات راستوں کو بند کرنے کے لئے اضافی دستوں کو تعینات کیا گیا ہے۔
سرکاری ذرائع نے بتایا کہ گھنے جنگلات، گہری کھائیوں اور غاروں کی وجہ سے کارروائیاں محتاط طریقے سے کی جارہی ہیں۔
راجوری اور پونچھ میں موبائل انٹرنیٹ خدمات مسلسل چوتھے دن بھی معطل رہیں گی۔
ذرائع نے بتایا کہ امکان ہے کہ وزیر دفاع بدھ کو علاقے کا دورہ کریں گے اور صورتحال سے نمٹنے کے لئے اٹھائے جانے والے اقدامات پر اعلی کمانڈروں کے ساتھ میٹنگ کریں گے۔
آرمی چیف جنرل منوج پانڈے نے پیر کے روز پونچھ کے گراو¿نڈ زیرو کا دورہ کیا تھا جہاں انہوں نے سورن کوٹ اور راجوری ضلع کے تھانہ منڈی جنگلاتی علاقے میں جاری انسداد دہشت گردی آپریشن کا جائزہ لیا تھا۔
جنرل پانڈے نے سکیورٹی اہلکاروں سے کہا کہ وہ تمام چیلنجوں کے خلاف ثابت قدم رہیں۔
پونچھ میں دھیرا کی گلی اور بفلیاز کے درمیان دھتیار موڑ پر جمعرات کو دہشت گردوں نے فوج کی دو گاڑیوں پر گھات لگا کر حملہ کیا تھا جس کے بعد فوج نے پوچھ تاچھ کے لئے تین شہریوں کو حراست میں لیا تھا۔
جموں و کشمیر انتظامیہ نے ہفتہ کے روز ہلاک ہونے والے شہریوں کے اہل خانہ کو معاوضہ اور نوکریوں کا اعلان کیا اور کہا کہ اس معاملے پر میڈیکو لیگل رسمی کارروائی کی گئی ہے اور قانونی کارروائی کی گئی ہے۔
فوج نے شہری ہلاکتوں کی مکمل داخلی تحقیقات کا حکم دیا ہے اور کہا ہے کہ وہ تحقیقات کے انعقاد میں مکمل حمایت اور تعاون فراہم کرنے کے لئے پرعزم ہے۔
