چلئے صاحب بلی تھیلے سے باہر آگئی ہے اور … اور اب شک کی کوئی گنجائش نہیں رہی… بالکل بھی نہیں رہی ۔ وہ کیا ہے کہ محکمہ بجلی کے پرنسپل سیکریٹری نے حکم دیا ہے اور… اور ان کا حکم… حکم نواب تادر نواب نہیں ہے… یہ حکم دیا ہے کہ محکمہ اضافی بجلی نہ خریدے کہ … کہ اس سے بجٹ کا توازن بگڑ جاتا ہے… کہنے کا مطلب کہ … کہ جموں کشمیر کو جتنی بجلی ملتی ہے… جموں کشمیر مقامی پیداوار کے علاوہ جتنی بجلی خریدتا ہے اس سے زیادہ نہ خریدی جائے… اس سے زیادہ خریدی نہیں جائیگی… بالکل بھی نہیں جائے … اور یقین کیجئے کہ ہمیں اس پر کوئی اعتراض نہیں ہے… اس لئے نہیں ہے کہ ہم الطاف بخاری نہیں ہیں جو ایل جی انتظامیہ کونااہل قراردیتے ہوئے اسے حکم دیں کہ وہ دہلی سے بجلی خریدنے کیلئے پیسے مانگے… نہیں صاحب ہم ایسا نہیں کہہ سکتے ہیں… یا کہنے کی جرأت نہیں کر سکتے ہیں… ہاں اتنا چاہتے ہیں کہ اگر پی ڈی ڈی کو اضافی بجلی خریدنے کی اجازت نہیں ہے اور… اور ساتھ ہی پی ڈی ڈی کے پرنسپل سیکریٹری غیر اعلانیہ کٹوتی کو نا قابل برداشت بھی قرار دیں تو… تو کوئی تو ہمیں بتائیے پھر بجلی آئیگی کہاں سے…کیسے ہمیں اور آپ کو غیر اعلانیہ کٹوتی سے نجات مل سکتی ہے… بالکل بھی نہیں مل سکتی ہے کہ…کہ ہمیں اس بات پر پورا بھروسہ ہے کہ پی ڈی ڈی کو لوگوں کو… عام لوگو ں کو ستانے کا‘ترسانے کا کوئی شوق نہیں ہے… بالکل بھی نہیں ہے کہ…کہ اگر محکمہ کو غیر اعلانیہ کٹوتی کا سہارا لینا پڑ رہا ہے تو… تو اس کی بھی یقینا کوئی مجبوری ہو گی اور… اور سو فیصد ہو گی ۔خیر بات چاہے کچھ بھی ہو… ایک بات تو واضح ہے کہ… کہ ایل جی انتظامیہ کے ایک افسر کی طرف سے یہ بات واضح کی گئی ہے کہ اضافی بجلی نہیں خریدی جائے گی اور… اور اس بات کا یہ مطلب ہو گا کہ آنے والے دنوں میں… جب سردی کی شدت میں مزید اضافہ ہو جائیگا… جب لوگوں… عام لوگوں کو بجلی کی اور زیادہ ضرورت ہو گی اور… اور شدت سے ہو گی… بجلی دستیاب نہیں ہو گی… اس میں مزید کٹوتی ہوگی… اعلانیہ اور غیر اعلانیہ بھی کہ…کہ سردی جتنی زیادہ بڑھ جائیگی … اتنی ہی بجلی کی مانگ میں بھی اضافہ ہو جائیگا… لیکن چونکہ اضافی بجلی نہ خریدنے کا حکم آیا ہے… اس لئے صاحب ایک اور تاریک سرما… جو تاریک ترین ہو گا کیلئے تیار ریئے ۔ ہے نا؟
