جموںکشمیر میں امسال ۲۵قومی کھیلوں کا انعقاد کیا جائے گا:حفیظ

سرینگر//
سکریٹری یوتھ سروسز اینڈ سپورٹس (وائی ایس ایس) سرمد حفیظ کا کہنا ہے کہ جموں وکشمیر میں امسال قومی سطح کی زائد از ۲۵کھیلوں کا انعقاد کیا جائے گا۔
حفیظ نے کہا کہ اس سلسلے میں گذشتہ ہفتے یہاں بخشی اسٹیڈیم میں دو کھیلوں کا لیفٹیننٹ گورنر منوج سنہا نے افتتاح کیا جبکہ اگلے ہفتے جموں میں مزید دو گیمز کا افتتاح کیا جائے گا۔
سکریٹری نے ان باتوں کا اظہار ہفتے کے روز یہاں۴۵ویں سینئر قومی سافٹ بال چمپیئن شپ کے آغاز کی مناسبت سے منعقدہ تقریب کے حاشیئے پر نامہ نگاروں کے ساتھ بات کرنے کے دوران کیا۔
حفیظ نے کہا’’ملک بھر کی ریاستوں اور یونین ٹریٹریوں سے۲۷ٹیمیں اس قومی سطح کی چمپیئن شپ میں حصہ لے رہی ہیں‘‘۔
ان کا کہنا تھا’’جموںکشمیر میں امسال۲۵سے زیادہ قومی سطح کی گیمز کا انعقاد کرنے کی کوشش کی جائے گی‘‘۔انہوں نے کہا کہ لیفٹیننٹ گورنر منوج سنہا نے گذشتہ ہفتے بخشی اسٹیڈیم میں دو گیمز کا افتتاح کیا جبکہ اگلے ہفتے جموں میں مزید دو گیمز کا افتتاح ہوگا۔
سیکریٹری نے کہا کہ اس سے ہماری ٹیم کے کھلاڑیوں کو نیا تجربہ حاصل کرنے اور سیکھنے کا موقع فراہم ہوگا۔انہوں نے کہا کہ ہم کھلاڑیوں کو انفراسٹرکچر کی فراہمی کے ساتھ ساتھ صلاحیتوں کا مظاہرہ کرنے کے لئے ایک پلیٹ فارم فراہم کرنے کی بھی کوشش کر رہے ہیں۔
حفیظ کا کہنا تھا کہ ہمارے نوجوان الگ الگ کھیلوں میں حصہ لے رہیں اور ان کو بہترین انفراسٹرکچر فراہم کیا جا رہا ہے ۔
موصوف سکریٹری نے کہا کہ اس چمپئین شپ میں۱۲سو کھلاڑی حصہ لے رہیں جو یہاں سے امن و آشتی اور بھائی چارے کا پیغام لے کر جائیں گے ۔