راجوری؍۱۶؍اکتوبر
راجوری ضلع کے بالائی علاقوں میں جمعہ کی شام سکیورٹی فورسز نے انسدادِ دہشت گردی کارروائی کے دوران ایک دیسی ساختہ دھماکہ خیز آلہ (آئی ای ڈی) برآمد کرکے اسے تباہ کردیا۔
حکام کے مطابق، بھارتی فوج اور جموں و کشمیر پولیس کی مشترکہ ٹیموں نے خفیہ ایجنسیوں کی معاونت سے ضلع کے بالائی علاقے کَنڈی کے تھنگوالی علاقے میں کارروائی شروع کی، جہاں دہشت گردوں کی ایک پرانی کمین گاہ کا پتہ لگایا گیا۔
کمین گاہ کی تلاشی کے دوران سکیورٹی فورسز نے ایک آئی ای ڈی برآمد کیا، جسے بعد ازاں کنٹرولڈ دھماکے کے ذریعے تباہ کردیا گیا۔
آخری اطلاعات موصول ہونے تک علاقے میں تلاشی کارروائی جاری تھی۔
ادھرجموںکے سرحدی ضلع پونچھ میں سیکورٹی اقدامات مزید سخت کرتے ہوئے سیکورٹی فورسز اور پولیس نے جمعہ کو چار مقامات پر تلاشی کارروائیاں شروع کیں۔
حکام کے مطابق، یہ کارروائیاں لائن آف کنٹرول کے قریب کرشنا گھاٹی سیکٹر میں مشتبہ آئی ای ڈی دھماکے میں پاکستان زیر انتظام جموں و کشمیر سے تعلق رکھنے والے چار مشتبہ جنگجوؤں کی ہلاکت اور اس کے بعد منگل کو ستھربن کے جنگلات میں ایک مبینہ جنگجو ٹھکانے کا پتہ لگائے جانے کے بعد شروع کی گئی ہیں۔
اس ہفتے مذکورہ ٹھکانے سے ایک خودکار رائفل، چھ دستی بم اور گولہ بارود برآمد کیا گیا تھا۔
حکام نے بتایا کہ گورسائی کے اسپیشل آپریشنز گروپ (ایس او جی) نے مینڈھر سب ڈویژن کے گورسائی، ہارونی اور بیدھر علاقوں میں تلاشی کارروائی شروع کی۔
ایک اور مشترکہ کارروائی ایس او جی مینڈھر اور فوج کی راشٹریہ رائفلز نے گاؤں دھرانہ، کشمیر محلہ، بھیری جنگلات اور ملحقہ علاقوں میں شروع کی۔
اسی دوران، ایس او جی مینکوٹ نے مینکوٹ پولیس چوکی کے دائرہ اختیار میں آنے والے منگلانو اور چلہ کے جنگلات میں بھی تلاشی کارروائی شروع کی۔
حکام کے مطابق، ان کارروائیوں کا مقصد سرحدی ضلع میں سیکورٹی کو مزید مضبوط بنانا اور ممکنہ جنگجو نقل و حرکت پر نظر رکھنا ہے۔ (ایجنسیاں)
۔۔۔۔۔۔۔۔
(ویب ڈیسک)
