جامع مسجد میںپر امن طریقے سے نماز ادا کی گئی:صوبائی کمشنر کشمیر

سرینگر//
صوبائی کمشنر کشمیر‘ وجے کمار بدھوری کا کہنا ہے کہ سرینگر کی تاریخی جامع مسجد میں میر واعظ عمر فاروق کی قیادت میں پر امن طریقے سے نماز ادا کی گئی اور لوگ پھر پر امن طریقے سے واپس اپنے گھروں کو بھی چلے گئے ۔
بدھوری نے کہا کہ اس کا کریڈٹ لوگوں اور ایجنسیوں کو جاتا ہے ۔
صوبائی کمشنر نے ان باتوں کا اظہار جمعہ کو یہاں نامہ نگاروں کے ساتھ بات کرنے کے دوران کیا۔انہوں نے کہا’’میر واعظ کی قیادت میں نماز پر امن طریقے سے ادا کی گئی اور لوگ بھی اپنے گھروں کو پر امن طریقے سے چلے گئے ‘‘۔
ان کا کہنا تھا کہ اس کا کریڈٹ لوگوں کو جاتا ہے اور ایجنسیوں کو بھی جاتا ہے جنہوں نے یہ فیصلہ صورتحال کا جائزہ لینے کے بعد اٹھایا۔
بدھوری نے کہا کہ صورتحال بہتر ہو رہی ہے امسال ہم نے دیکھا کہ ٹولپ گارڈن اور شری امرناتھ یاترا میں ریکارڈ تعداد میں لوگ آئے ۔
ایک سوال کے جواب میں انہوں نے کہا کہ سماج سے برائیوں کو دور کرنے کے لئے ہر سماج کے فرد کا رول ہوتا ہے ۔انہوں نے کہا کہ سماج سے منشیات کی وبا کو ختم کرنے کیلئے ہم نے مذہبی لیڈروں کو بھی اپنا رول ادا کرنے کی اپیل کی۔
بتادیں کہ میر واعظ عمر فاروق نے جامع مسجد میں۴سال بعد خطبہ جمعہ دیا۔