جی۲۰کا نئی دہلی اعلامیہ اتفاق رائے سے جاری ہونے کی امید ہے:امیتابھ کانت

نئی دہلی//
ہندوستانی صدارت میں جی۲۰سربراہی اجلاس کے موقع پر حکومت نے جمعہ کو امید ظاہر کی کہ سربراہی اجلاس ایک اتفاق رائے سے ’نئی دہلی اعلامیہ‘جاری کرے گا جو اس کے مفادات، ترجیحات اور خدشات کی عکاسی کرے گا جس سے گلوبل ساؤتھ اور پائیدار ترقی کے اہداف میں تیزی آئے گی۔
ہندوستانی شرپا‘امیتابھ کانت، خارجہ سکریٹری ونے موہن کواترا، فنانس سکریٹری اجے سیٹھ اور جی۲۰کے چیف کوآرڈینیٹر ہرش وردھن شرنگلا نے پرگتی میدان میں بھارت منڈپم میں جی۲۰کی تیاریوں کے درمیان قومی بین الاقوامی میڈیا کے نمائندوں سے خطاب کرتے ہوئے اس امید کا اظہار کیا۔
کانت نے کہا کہ پچھلے سال جب ہندوستان نے جی۲۰کی صدارت سنبھالی تھی، دنیا میں اقتصادی ترقی اور پیداوار کی شرح بہت سست تھی۔ قرضوں کا بحران تھا، پائیدار ترقی کے اہداف مخالف سمت میں چل رہے تھے اور موسمیاتی تبدیلی پر قابو پانے کیلئے ضروری اقدامات نہیں کیے جا رہے تھے ۔
ہندوستانی شرپا نے کہا’’جی۲۰کی صدارت سنبھالنے کے بعد ہندوستان نے فیصلہ کیا کہ ہم شمولیت کے جذبے اور واسودھیوا کٹمبکم کے اصول کے ساتھ چلیں گے ۔ ہم نے پایا کہ دنیا کا ایک تہائی حصہ کساد بازاری کی زد میں ہے ۔ ہم نے پائیدار اقتصادی ترقی شروع کرنے کا فیصلہ کیا۔ ہمیں پائیدار ترقی کے اہداف کے حصول کی طرف تیزی سے آگے بڑھنا ہے ۔ دنیا میں آلودگی اور کاربن کے اخراج پر قابو پانے کے لیے گرین اقدامات کرنا ہوں گے اور اس کے لیے گلوبل ساؤتھ کے ترقی پذیر ممالک کو مالی امداد فراہم کرنا ہوگی۔ ہم نے کثیر الجہتی ترقیاتی بینکوں میں اصلاحات، ٹیکنالوجی پر مبنی عوامی انفراسٹرکچر کی تعمیر اور خواتین کی قیادت میں ترقی پر توجہ مرکوز کی‘‘۔
کانت نے کہا کہ چونکہ ہندوستان نے ایک منفرد ڈیجیٹل پبلک انفراسٹرکچر (ڈی پی آئی) بنایا ہے جس میں فوری ادائیگیاں قابل رسائی ہو گئی ہیں۔ اسے دنیا کے لیے ایک بہت اہم ٹول کے طور پر دیکھا جا رہا ہے کیونکہ تقریباً چار ارب لوگ ڈیجیٹل رسائی سے محروم ہیں۔
ہندوستانی شرپا نے کہا کہ جی۲۰کانفرنس میں ۱۹ممالک‘ ایک یورپی یونین‘ نو خصوصی مہمان ممالک‘ تین علاقائی اور۱۱بین الاقوامی تنظیموں نے شرکت کی ہے جس کی صدارت ہندوستان کرے گا۔
ان کاکہنا تھا کہ جی۲۰کے۲۰۰سے زیادہ اجلاس ہندوستان کی ہر ریاست اور مرکز کے زیر انتظام علاقوں کے۶۰شہروں میں منعقد ہوئے۔کانفرنس میں افریقہ نے سب سے زیادہ شرکت کی۔۳۲دیگر ممالک کے نمائندوں نے بھی مختلف پروگراموں میں شرکت کی۔ گلوبل ساؤتھ کا ایک سربراہی اجلاس منعقد ہوا جس میں۱۲۵ممالک نے شرکت کی اور پہلی بار اپنی آواز کو مضبوط طریقے سے پیش کیا گیا۔
ہندوستانی شرپا نے کہا کہ جی۲۰پلیٹ فارم پر گلوبل ساؤتھ کے ممالک کے مفادات، ترجیحات اور خدشات کو ایک اہم مقام دینے کا ہندوستان کا ارادہ جی۲۰کو مزید جمہوری بنانے کی طرف ایک اہم پہل رہا ہے ۔ اس کے علاوہ ایک ضلع ایک مصنوعات کی تشہیر اور موٹے اناج کی مہم بھی ہندوستان کی کامیابیاں ہیں۔