یوم آزادی کی تقریبات :سرینگر اور جموں میں سکیورٹی مزید سخت

سرینگر/جموں/۱۱اگست
یوم آزادی کی تقریبات کے پیش نظر سرینگر اور جموں میں سکیورٹی بڑھا دی گئی ہے۔
سرینگرلال چوک سمیت شہر کے حساس مقامات پر سکیورٹی فورسز اور پولیس کا کڑا پہرہ بٹھایا گیا ہے۔ لالچوک میں جگہ جگہ پر گاڑیوں کی تلاشی لی جارہی ہے وہیں مشکوک افراد کی جامہ تلاشی کے علاوہ شناختی کارڈ بھی چیک کیے جارہے ہیں۔
76 ویں یوم آزادی کی تقریبات کو خوش اسلوبی سے انجام دینے کے لیے جہاں وادی بھر میں سکیورٹی کے غیر معمولی انتظامات کیے گئے ہیں وہیں کسی بھی امکانی گڑ بڑ سے نمٹنے کے لیے فورسز کی بھاری تعیناتی عمل میں لائی گئی ہے۔اہم اور حساس مقامات پر سکیورٹی اہلکاروں کو متحرک کر دیا گیا ہے۔
جموں وکشمیر میں یوم آزادی کی سب سے بڑی تقریب سرینگر کے شیر کشمیر کرکٹ اسٹیڈیم سونہ وار میں منعقد ہوگی۔جہاں لیفٹیننٹ گورنر منوج سنہا قومی جھنڈا لہرائے گے اور پریڈ پر سلامی لے گے۔ایسے میں ایس کے اسٹڈیم کو فوجی چھاونی میں تبدیل کر دیا گیا۔اسٹڈیم کے آس پاس فورسز کو بھاری تعداد میں تعینات کیا گیا ہے۔ اسٹڈیم جانے والے تمام راستوں کو سیل کر دیا گیا ہے۔ سی سی ٹی وی کیمروں کے علاوہ اسٹڈیم میں ڈرون سے بھی نظر گزر رکھی جارہی ہے۔
ادھر وادی کے دیگر اضلاع میں بھی یوم آزادی کی تقریبات بہتر طور انجام دینے کے حوالے سے حفاظت کے معقول انتظامات کیے گئے ہیں۔جگہ پر جگہ پر بندشیں کھڑی کر کے نہ صرف گاڑیوں کی تلاشی لی جارہی ہے بلکہ راہ گیروں سے بھی پوچھ گچھ کی جارہی ہے۔
دریں اثناذرائع کے مطابق جموں وکشمیر میں جہاں سیکورٹی فورسز کی گشت کو بڑھا دیا گیا ہے وہیں گاڑیوں اور راہگیروں کی چیکنگ کا سلسلہ بھی شروع کیا گیا ہے ۔
بتادیں کہ امسال جموں و کشمیر میں یوم آزادی کی سب سے بڑی تقریب بخشی اسٹیڈیم میں منعقد ہوگی جہاں لیفٹیننٹ گورنر منوج سنہا قومی پرچم لہرائیں گے ۔
ذرائع نے بتایا کہ یونین ٹریٹری کے باقی حصوں کی طرح ضلع اودھم پور میں بھی سیکورٹی کو مزید سخت کر دیا گیا ہے ۔انہوں نے کہا کہ سیکورٹی فورسز جہاں گاڑیوں اور راہگیروں کی چیکنگ کر رہے ہیں وہیں گشت کو بھی بڑھا دیا گیا ہے ۔
ان کا کہنا تھا کہ سرینگر‘ جموں قومی شاہراہ پر خاص طور پر نگرانی کو بڑھا دیا گیا ہے ۔
ڈوڈہ‘ کشتواڑ ہ رام بن رینج کے ڈپٹی انسپکٹر جنرل سنیل گپتا نے گذشتہ روز اپنے دورہ کشتواڑ کے دوران سیکورٹی بندوبست کا وسیع پیمانے پر جائزہ لیا۔
دریں اثنا جموں کے دیگر حصوں اور سری نگر میں بھی یوم آزادی کے پیش نظر سیکورٹی بندوبست کو مزید بڑھایا جا رہا ہے ۔
حکام کا کہنا ہے کہ امسال بھی یوم آزادی کی تقریبات کے پر امن انعقاد کو یقینی بنایا جا ئے گا۔