مجوزہ ریزرویشن ترمیمی بل‘گوجر بکروالوں کا احتجاج

سرینگر//
جموںکشمیر کی گرمائی راجدھانی سری نگر کی پریس کالونی میں گوجر بکروال طبقہ سے وابستہ نوجوانوں کی ایک بڑی تعداد نے مجوزہ ریزرویشن ترمیمی بل کے خلاف احتجاج کیا۔
معلوم ہوا ہے کہ جوں ہی مظاہرین نے مین سڑک کی اور پیش قدمی شروع کی تو پولیس نے متعدد مظاہرین کو احتیاطی طورپر حراست میں لیا۔
اطلاعات کے مطابق منگل کی سہ پہر کو گوجر بکروال ایسو سی ایشن کے بینر تلے سری نگر کی پریس کالونی میں احتجاج کیا گیا۔
نامہ نگار نے بتایا کہ ہاتھوں میں پلے کارڈ اٹھائے مظاہرین نے دھمکی دی کہ اگر سرکار نے اس طرح کا کوئی فیصلہ لیا تو پورے جموں وکشمیر میں گوجر بکروال احتجاج شروع کریں گے۔
مظاہرین سے خطاب کے دوران گوجر لیڈروں نے بتایا کہ اگر حکومت نے گوجر اور بکروال طبقے کے خلاف کوئی بھی فیصلہ لیا تو اس سے کسی بھی صورت میں برداشت نہیں کیا جائے گا۔انہوں نے کہاکہ ریزرویشن پر ہمارا حق ہے اور ہم کسی کو اپنا حق چھیننے کی ہرگز اجازت نہیں دیں گے۔ان کا مزید کہنا تھا کہ سرکار کوایسا کوئی فیصلہ نہیں لینا چاہئے جس سے گوجر بکروال طبقے کے ساتھ نا انصافی ہو۔
نامہ نگار نے بتایا کہ کافی دیر تک پریس کالونی میں نعرے بازی کے بیچ جوں ہی جلوس کے شرکاء نے مین سڑک کی طرف پیش قدمی شروع کی تو پولیس نے متعدد گوجر بکروال لیڈروں کو احتیاطی طورپر حراست میں لے لیا تاہم اس کے باوجود بھی پریس کالونی میں نعرے بازی کا سلسلہ کافی دیر تک جاری رہا۔