شوپیاں میں غیر مقامی مزدوروں پر حملہ:ایس ایچ اوکو منسلک کردیا گیا

سرینگر//
جنوبی کشمیر کے ضلع شوپیاں میں غیر مقامی مزدوروں پر ہوئے حملے کے چند روز بعد منگل کو جموں وکشمیر پولیس نے ایس ایچ او کو منسلک کر دیا ہے ۔
پولیس کا کہنا ہے کہ انکوائری التوا میں ہونے پر ایس ایچ او شوپیاں غلام جیلانی بٹ کو رینج پولیس ہیڈ کوارٹر اننت ناگ کے ساتھ منسلک کر دیا گیا ہے ۔
اطلاعات کے مطابق شوپیاں کے گاگرن گاوں میں ۱۳جولائی۲۰۲۳کو تین غیر مقامی مزدوروں پر حملے کے بعد پولیس اسٹیشن شوپیاں میں تعینات ایس ایچ او انسپکٹر غلام جیلانی بٹ کو پولیس ہیڈ کواٹر اننت ناگ کے ساتھ منسلک کر دیا گیا ہے ۔
ڈی آئی جی جنوبی کشمیر رائیس احمد بٹ کی جانب سے جاری کئے گئے حکم نامہ کے مطا بق گاگرن شوپیاں میں۱۳جولائی کی شام کو ملی ٹینٹ حملے میں تین غیر مقامی مزدور زخمی ہوئے جس کے بعد ایس ایچ او پولیس اسٹیشن شوپیاں انسپکٹر غلام جیلانی بٹ کو فی الحال پولیس ہیڈ کواٹر اننت ناگ کے ساتھ اٹیچ کیا گیا ہے ۔
بتادیں کہ۱۳جولائی کی شام کو گاگرن شوپیاں میں مشتبہ ملی ٹینٹوں نے غیر مقامی مزدوروں پر فائرنگ کی جس کے نتیجے میں تین افراد شدید طورپر زخمی ہوئے جن کی بعد میں شناخت انمول کمار، پنٹو کمار ٹھاکر اور ہیرالال یادو ساکنان بہار کے بطور ہوئی ۔
واضح رہے کہ۲۶فروری کو اچھن پلوامہ میں مشتبہ ملی ٹینٹوں نے کشمیری پنڈت سیکورٹی گارڈ پر فائرنگ کی جس کے نتیجے میں اس کی برسر موقع ہی موت واقع ہوئی۔
تین ماہ کے بعد یعنی ۲۹مئی کو جنگلات منڈی اننت ناگ میں سرکس میں کام کرنے والے مزدور پر بھی فائرنگ کی گئی اور بعد ازاں ہسپتال میں وہ زخموں کی تاب نہ لا کر دم توڑ گیا۔