دو روزہ دورے پر احمد آباد پہنچے جانسن

احمدآباد/۲۱؍اپریل
برطانیہ کے وزیراعظم بورس جانسن ہندوستان کے دو روزہ دورے پر آج صبح احمدآباد پہنچے ۔
ہوائی اڈے پر گجرات کے گورنر آچاریہ دیوورت اور وزیراعلی بھوپیندر پٹیل نے مسٹر جانسن کا خیر مقدم کیا۔
وزارت خارجہ کے مطابق وزیراعظم نریندرمودی کی دعوت پر ہندوستان کے دورے پر آئے مسٹر جانسن آج دن میں گجرات میں مختلف پروگراموں میں شرکت کریں گے اور اس کے بعد رات کو دارالحکومت دہلی پہنچیں گے ۔
جمعہ کی صبح برطانوی وزیراعظم کا راشٹرپتی بھون میں رسمی استقبال کیا جائے گا۔اس کے بعد وہ بابائے وقوم مہاتما گاندھی کی سمادھی پر خراج عقیدت پیش کرنے راج گھاٹ جائیں گے ۔پھر وزیر خارجہ ایس جے شنکر ان سے ملاقات کریں گے ۔صبح گیارہ بجے وہ حیدرآباد ہاؤس میں وزیراعظم مودی کے ساتھ دو روزہ میٹنگ میں حصہ لیں گے ۔
میٹنگ میں دونوں رہنما روڈ میپ۲۰۳۰کے نفاذ کا جائزہ لینے کے ساتھ ہی دوطرفہ تعلقات کے سبھی شعبوں میں تعاون بڑھانے کے بارے میں ویژن سامنے رکھیں گے ۔وہ باہمی مفادات کے سلسلے میں مختلف علاقائی اور عالمی مسئلوں پر بھی تبادلہ خیال کریں گے ۔
بعد میں دونوں ملکوں کے درمیان مختلف شعبوں میں تعاون بڑھانے کے لئے معاہدوں پر دستخط کئے جائیں گے اور دونوں رہنماؤں کے پریس بیان ہوں گے ۔مسٹر جانسن جمعہ کی رات ساڑھے دس بجے اپنے وطن لوٹ جائیں گے ۔