نیا کشمیر تشکیل پارہا ہے :سنہا

جموں/۶ جون
جموں کشمیر کے لیفٹیننٹ گورنر‘ منوج سنہا نے منگل کو کہا کہ سری نگر میں کامیاب جی ٹونٹی اجلاس کے بعد’نیا کشمیر‘ تشکیل پا رہا ہے۔ سنہا کاکہنا تھا کہ سیکورٹی فورسز وادی میں”کسی بھی چیلنج سے نمٹنے کےلئے پوری طرح سے اہل ہیں“۔
جموں میں نامہ نگاروں سے بات کرتے ہوئے منوج سنہا نے کہا”چیلنجز آتے ہیں لیکن اب ہم چیلنجوں سے کامیابی سے نمٹنے کے قابل ہیں۔ پہلی بار جموں و کشمیر میں اتنی بڑی بین الاقوامی سطح کی تقریب (جی ٹونٹی) کا انعقاد کیا گیا۔
سرینگر میں منعقدہ جی ٹونٹی ٹورازم ورکنگ گروپ کی حالیہ میٹنگ کا حوالہ دیتے ہوئے ایل جی نے کہا”جموں و کشمیر کے لوگوں نے اس تقریب کو کامیاب بنانے میں ہمارا بھرپور ساتھ دیا۔ انتظامیہ اور سیکورٹی فورسز نے بھی کام کیا“۔
سنہا نے مزید کہا کہ ایک نیا جموں و کشمیر تشکیل پا رہا ہے۔
اگست۲۰۱۹ میں آرٹیکل۳۷۰ کی منسوخی کے بعد پہلی بار۲۲سے۲۴ مئی کے درمیان سری نگر میں سخت حفاظتی انتظامات کے درمیان جی ٹونٹی تقریب کا انعقاد کیا گیا۔
ہندوستان اپنی جی ٹونٹی صدارت کے تحت اس وقت نئی دہلی میں ستمبر میں منعقد ہونے والے جی ٹونٹی سربراہی اجلاس کی قیادت میں ملک بھر میں میٹنگیں کر رہا ہے۔
سنہا نے شری امرناتھ جی یاترا کےلئے سیکورٹی کے تمام تر انتظامات کی یقین دہانی کرتے ہوئے کہا کہ ہم کسی بھی چیلنج کا مقابلہ کرنے کی صلاحیت رکھتے ہیں۔انہوں نے کہا کہ جموں میں مزید چار سے پانچ یاتری نواس بنائے جائیں گے ۔
ایل جی نے کہا کہ یاتریوں کےلئے مزید چار سے پانچ یاتری نواس بن جائیں گے جب کہ چندن واڑی سے بالتل ایک روڈ کی تعمیر بھی زیر غور ہے ۔
سنہا نے کہا کہ اس روڈ سے یاتریوں کا وقت بچ جائے گا اور زیادہ سے زیادہ یاتری بابا امرناتھ کی یاترا کر سکیں گے ۔
قبل ازیں انہوں نے یاتری نواس کا سنگ بنیاد رکھنے کے بعد اپنے ایک ٹویٹ میں کہا”میں وزیر اعظم نریندر مودی جی اور مرکزی وزیر ہردیپ پوری جی کا شری امرناتھ جی شرائن بورڈ کے جموں میں یاتری نواس قائم کرنے پر شکر گذار ہوں“۔انہوں نے ٹویٹ میں کہا کہ اس نئی سہولیت سے بابا امرناتھ کی یاترا کرنے والے یاتریوں کی زندگی میں آسانی پیدا ہوگی۔
اس موقع پر مرکزی وزیر ہردیپ سنگھ پوری نے کہا کہ جموں و کشمیر انتظامیہ کی طرف سے جتنے بھی یاتری نواس قائم کرنے کی تجویز پیش کی گئی ہے ان سب کو منظوری دی جائے گی۔انہوں نے کہا کہ ہم ان پروجیکٹوں کی تیز بنیادوں پر فنڈنگ کو یقینی بنائیں گے ۔