نہ جانے اپنے مودی جی نے اپوزیشن کا کیا بگاڑا ہے جو اپوزیشن ہاتھ دھو کے ان کے پیچھے پڑ گئی ہے… مودی جی جو کرتے ہیں ‘ جو کہتے ہیں… حزب اختلاف اس کی مخالفت کرتی ہے … مانا کہ حزب اختلاف کا کام مخالفت کرناہی ہے‘ لیکن صاحب یہ کیا بات ہو ئی کہ وہ بات بات اور ہر ایک بات پر مخالفت کرے ۔ اب ایسا بھی نہیں ہے کہ اپنے مودی جی جو بھی کام کریں … وہ اس کیلئے مخالفت کے مستحق ہیں…ا یسا نہیں ہے اور ایسا ہو نہیں سکتا ہے… مودی جی نے پارلیمنٹ کی نئی عمارت بنوائی … ایک شاندار عمارت … اسی عمارت کا مودی جی اتوار ۲۸ مئی کو افتتاح کرنے جا رہے ہیں… اور اپوزیشن اس کی بھی مخالفت کررہی ہے… مخالفت ہی نہیں کررہی ہے بلکہ اس تقریب کا بائیکاٹ بھی کررہی ہے… اس لئے کررہی ہے کہ اس عمارت …پارلیمنٹ کی نئی عمارت کا افتتاح مودی جی کیوں کررہے ہیں کہ اپوزیشن کا جاننا اور ماننا ہے کہ پارلیمنٹ کی نئی عمارت کا افتتاح صدر مملکت کو کرنا چاہئے اور… اور اس لئے کرنا چاہئے کیونکہ آئین کے مطابق صدر صاحبہ پارلیمنٹ کی بھی سربراہ ہیں… اس لئے افتتاح انہی کو کرنا چاہئے تھا … چونکہ صدر صاحبہ افتتاح نہیں کررہی ہیں… اس لئے اپوزیشن افتتاحی تقریب کا بائیکاٹ کررہی ہے… اب آپ ہی بتائیے کہ ہم بتلائیں کیا …وہ کیا ہے کہ مودی جی نے پارلیمنٹ کی نئی عمارت بنوانے کی منصوبہ بندی کی ‘ اس منصوبے کو عملایا … اس کیلئے خطیر رقم کا بندو بست کیا ‘ محض دو تین برسوں میں اس کی تکمیل کو ممکن بنایا اور… اور آج یہ ہمارے سامنے ایک شاہکار کے طور پر موجود ہے… اور اس لئے موجود ہے کیونکہ اسے مودی جی نے بنوایا … کسی اور نے نہیں بنوایا … اگر مودی جی اسے نہیں بنوا لیتے تو… تو یقین کیجئے کہ آج یہ ہمارے بیچ میں موجود نہیں ہو تی… بالکل بھی نہیں ہوتی …یہ اس لئے ہے کیونکہ مودی جی نے ایسا چاہا… مودی جی جو چاہتے ہیں وہ ہوجاتا ہے… اس لئے یہ بھی عمارت بھی ہوئی … پایہ تکمیل کو ہوئی … اس لئے اگر مودی جی اب پار لیمنٹ کی اس نئی عمارت کا افتتاح کر بھی لیتے ہیں تو … تو اس میںحرج کیا ہے کہ… کہ افتتاح کرنے کا یہ مطلب نہیں کہ یہ عمارت … پارلیمنٹ کی نئی عمارت مودی جی کی ذاتی جاگیر بن جائیگی … مودی جی اس عمارت کو بنتے دیکھ کر خوش ہیں…اور اس کا افتتاح اپنے ہاتھوں سے کرکے وہ اور بھی زیادہ خوش ہوں گے… اور مودی جی خوش ہوں‘ وہ خوش رہیں‘ یہ سب سے اہم ہے… ان کیلئے اور ملک کیلئے بھی… لیکن اپوزیشن ہے کہ ان سے ان کی اتنی خوشی بھی دیکھی نہیں جا رہی ہے… بالکل بھی نہیں جارہی ہے ۔ ہے نا؟
