شمالی اور جنوبی کشمیر میں شدید ژالہ بھاری‘سڑکوں پر د و انچ سفید پرت جمع

سرینگر//
جنوبی اور شمالی کشمیر کے متعدد علاقوں میں موسلا دھار بارشوں کے بیچ زور دار ژالہ بھاری ہوئی جس وجہ سے کھڑی فصلوں اور میوہ باغات کو نقصان پہنچا ہے ۔
اطلاعات کے مطابق پیر کی سہ پہر کو جنوبی اور شمالی کشمیر کے بعض علاقوں میں موسم نے کروٹ لی جس کے ساتھ ہی شدید ژالہ بھاری کا سلسلہ شروع ہوا۔
معلوم ہوا ہے کہ ٹنگمرگ کے متعدد علاقوں میں شدید ژالہ بھاری کی وجہ سے لوگ گھروں میں سہم کررہ گئے ۔
نامہ نگار نے بتایا کہ ژالہ بھاری سے کھڑی فصلوں، میوہ باغات اور سبزی باغوں کو کافی نقصان پہنچا ہے ۔
کولگام کے منز گام میں پیر کی سہ پہر کو اس وقت سنسنی کا ماحول پھیل گیا اور لوگ مکانوں کی چھتوں پر کلمہ طیبہ کا ورد کرنے لگے جب شدید ژالہ بھاری نے ایک وسیع علاقے کو لپیٹ میں لے لیا۔
نامہ نگار نے بتایا کہ شدید ژالہ بھاری کا اس بات سے بخوبی اندازہ لگایا جاسکتا تھا کہ دس منٹوں تک جاری ژالہ بھاری کی وجہ سے پورے گاوں میں دو انچ کی سفید پرت جمع ہوئی اور ایسا لگ رہا تھا علاقے میں برف باری ہوئی ہے ۔
مقامی ذرائع نے بتایا کہ ژالہ بھاری سے دھان کی فصلوں کو بے تحاشہ نقصان پہنچا اور میوہ جات بشمول سیب، ناشپاتی، خوبانی وغیرہ کے باغوں کو بھی نقصان پہنچنے کی اطلاعات موصول ہوئی ہے ۔
مقامی لوگوں نے بتایا کہ ژالہ بھاری اس قدر شدید تھی کہ زمین پردو انچ کی سفید پرت جمع ہوئی۔ان کے مطابق کافی دیرتک ژالہ بھاری کی وجہ سے باغات کو نقصان پہنچا ہے ۔