جموں کشمیر مین منڈل کمیشن کی رپورٹ عملائی جائے:بخاری

بشناہ//
اپنی پارٹی صدرسید محمد الطاف بخاری نے وزیر اعظم نریندر مودی سے جموں کشمیر میں دیگر پسماندہ طبقہ جات کے حق میں منڈل کمیشن رپورٹ کی عمل آوری اور سبھی یومیہ اُجرت ملازمین کی مستقلی کا مطالبہ کیا ہے۔
بشناہ میں او بی سی سے وابستہ سرگرم پارٹی ورکروں کے کنونشن سے خطاب کرتے ہوئے بخاری نے اُمیدظاہر کی کہ ضلع سانبہ کے دورہ کے دور وزیر اعظم منڈل کمیشن رپورٹ کی عمل آوری کا مطالبہ کریں گے جس کی رو سے ملک کی دیگر ریاستوں کی طرح جموںکشمیر میں بھی او بی سی طبقہ جات کے لوگ ۲۷فیصد ریزرویشن حاصل کرنے کے اہل ہوسکیں گے۔
اپنی پارٹی کے صدر نے کہاکہ جموں کشمیر میں او بی سی طبقہ جات کو دہائیوں سے متعدد سیاسی جماعتوں نے ریزرویشن سے محروم رکھا اور اِس طبقہ کو صرف ووٹ بینک کے طور استعمال کیا مگر اُن کے ساتھ کئے وعدوں کو کبھی بھی پورا نہیں کیا۔
وزیر اعظم کے دورہ کے پیش نظر بخاری نے اُمید ظاہر کی کہ لوگوں کا یہ دیرینہ مطالبہ تسلیم کیاجائے گا۔
پچھلے تین سالوں سے لوگوں کو درپیش گوناگوں مشکلات کے حوالے سے بخاری نے کہاکہ بھارتیہ جنتا پارٹی نے جموں وکشمیر کا خصوصی درجہ ختم کر کے اپنے منشور کو عملی جامہ پہنایا اور یہ تاثر دیاگیاکہ سابقہ ریاست میں دفعہ۳۷۰؍اوردفعہ۳۵اے ہی ترقی اور روزگار میں رکاوٹ تھی لیکن اِس کے بعد بھی کوئی تبدیلی رونما نہیں ہوئی۔ انہوں نے کنونشن میں موجود لوگوں سے سوال کیاکہ کیا اِن سالوں میں جموں کے اندر کوئی تبدیلی ہوئی؟ جس کے بعد جواب میں لوگوں نے باآواز بلند یک زباں ہوکر کہاکچھ بھی نہیں بلکہ اُن کی مشکلات میں کئی گناہ اضافہ کیاگیاہے۔’’بے روزگاری بڑی ہے، قدرتی وسائل پر غیر ریاستی لوگوں نے قبضہ جما لیا ہے۔ریت وبجری کی قیمتوں میں بے تحاشہ اضافہ ہوا ہے۔ بھاجپا نے جو بلند وبانگ دعوے کئے تھے ، وہ زمینی سطح پر کہیں بھی دکھائی نہیں دے رہی۔ پارٹی عوام سے کئے ہوئے وعدوں کو پورا کرنے میں ناکام رہی ہے‘‘۔
بخاری نے کہا کہ جموں میں گرمائی ایام کے دوران غیر اعلانیہ بجلی کٹوتی ۱۶گھنٹوں تک پہنچ گئی ہے۔ اسی طرح حکومت بڑھتی بے روزگاری پر قابو پانے میں بھی ناکام ثابت ہورہی ہے۔انہوں نے کہا کہ ایک لاکھ ڈیلی ویجروں کے مسائل بھی ابھی حل طلب ہیں اورُامید ہے کہ وزیر اعظم دورہ کے دوران اُن کی ریگولر آئزیشن کا مطالبہ پورا کیاجائے گا۔
اپنی پارٹی صدر نے آنگن واڑی ورکرز، پی ایچ ای ڈیلی ویجرز، شعبہ سیاحت کے ملازمین، زراعت ودیگر ملازمین کے مطالبات کو حل نہ کرنے پر گہری تشویش کا اظہار کیا۔
بخاری نے جموں وکشمیر کے قدرتی وسائل پر غیر مقامی افراد کے قبضے پر بھی گہری تشویش کا اظہار کرتے ہوئے کہاکہ تعمیراتی سامان کی قیمتوں میں غیر متوقع سطح تک اضافہ کر دیاگیاہے۔ انہوں نے کہا’’لوگوں کی شکایات ہیں کہ تعمیراتی سامان اور دیگر اشیاء ضروریہ کی قیمتوں میں بے حداضافہ کیاگیاہے۔ لہٰذا ہم اُمید کرتے ہیں کہ وزیر اعظم نریندر مودی اِن سبھی مسائل کو حل کریں گے‘‘۔
اپنی پارٹی کے صدر نے کہاکہ پی ڈی پی لائن مین فرائض کی انجام دہی کے دوران اپنی قیمتی جانیں کھورہے ہیں لیکن اُ ن کے مطالبات پر کوئی توجہ نہیں دی جارہی ، اُمید کرتے ہیں کہ یہ معاملہ بھی حل کیاجائے گا۔
بخاری نے کہاکہ جموںکشمیر میں لوگ موجودہ انتظامیہ سے اُکتا چکے ہیں کیونکہ بیروکریسی لوگوں کا اعتماد کھوچکی ہے۔ انہوں نے مطالبہ کیاکہ جلد سے جلد جموں وکشمیر کا ریاستی درجہ بحال کر کے جمہوری نظام شروع کیاجائے۔