عوامی شکایات کا بروقت حل کرنا حکومت کا پختہ عزم ہے :لیفٹیننٹ گورنر

جموں//
لیفٹیننٹ گورنر‘ منوج سِنہا نے آج ان شہریوں سے بات چیت کی جنہوں نے ’ایل جی ملاقات ‘ کے دوران جے کے جی آر اے ایم ایس پورٹل پر اَپنی شکایات پیش کی تھیں۔
لیفٹیننٹ گورنر نے کہا کہ عوامی شکایات کا بر وقت حل کرنا اور ہمہ جہت ترقی کیلئے تیز ی سے تبدیلی لانے کا ہمارا پختہ عزم ہے ۔
سنہا کہا کہ ہم نے موثر پبلک سروس ڈیلیوری میکانزم تیار کرنے کیلئے متعدد بڑے اقدامات شروع کئے ہیں اور اس سے عام آدمی کی زندگی میں آسانی پیدا ہوئی ہے۔
لیفٹیننٹ گورنرنے کہا کہ شفاف اور جواب دہ طرزِ حکمرانی اِس بات کو یقینی بنارہی ہے کہ ترقی کا فائدہ تمام طبقوںکے ہرفرد تک پہنچے۔
سنہانے شہریوں سے بات چیت کے دوران ان کی شکایات اور متعلقہ ضلع ترقیاتی کمشنر کی طرف سے کی گئی کارروائی کا جائزہ لیا۔اُنہوں نے گزشتہ میٹنگ میں دی گئی ہدایات پرکی گئی کارروائی کی تفصیلات بھی طلب کیں۔
لیفٹیننٹ گورنر نے شنکر آچاریہ چوٹی کے دامن میں ماحولیاتی تحفظ اور صفائی ستھرائی سے متعلق سری نگرکے ایک شخص کی شکایت پر کمشنر سرینگر میونسپل کارپوریشن کو مناسب کارروائی کرنے کیلئے ترجیحی بنیادوں پر اِس معاملے کو دیکھنے کی ہدایت دی۔
اننت ناگ کے ڈسٹرکٹ میٹرنٹی اینڈ چائلڈ کیئر ہسپتال شیر باغ کے وارڈوں اور باتھ روموں کے بارے میں شکایت کا جواب دیتے ہوئے ضلع ترقیاتی کمشنر اننت ناگ نے چیئر کو جانکاری دی کہ ہسپتالوں کے باتھ روموں کی تزئین و آرائش اور فیس لفٹنگ کا کام پہلی ہی مکمل کیا جاچکا ہے اور شکایات کا ازالہ کیا گیا ہے۔
لیفٹیننٹ گورنر نے بارہمولہ سے تعلق رکھنے والے عرفان رسول کی نگنلی نالہ میں کوڑاکرکٹ پھینکنے اور ماحولیات پر اس کے مضر اثرات کے بارے میں شکایت کا ازالہ کرتے ہوئے ضلع ترقیاتی کمشنر سے کہا کہ وہ کوڑاکرکٹ اِنتظام کے لئے مقامی پی آر آئی کے ذریعے ایک جامع حکمت عملی مرتب کریں۔
پلوامہ سے تعلق رکھنے والے فاروق احمد نے حاجی بل میں غیر قانونی ریت نکالنے کی شکایت پیش کی تھی جس پر لیفٹیننٹ گورنر نے ضلع ترقیاتی کمشنر کو سخت اور فوری کارروائی کرنے کی ہدایت دی۔
اِنتظامی سیکرٹری محکمہ صحت و طبی تعلیم نے سی ایچ سی بنی میں گائنا کالوجسٹ سپیشلسٹ کی عدم دستیابی کی شکایت کا جواب دیتے ہوئے چیئر کو آگاہ کیا کہ فوری طور پر روٹیشن کی بنیاد پر ماہر کا بندوبست کیا جائے گا۔
ایل جی ملاقات کے موقعہ پر زراعت اور اس سے منسلک شعبے کی ہمہ جہت ترقی کیلئے تربیتی پروگرام کے کامیاب عمل آوری پر بھی بات چیت ہوئی ۔ یہ تربیتی پروگرام محکمہ زراعت کی طرف سے تمام ۲۰؍اَضلاع میں کسانوں کیلئے چلایا جارہا ہے ۔ ایڈیشنل چیف سیکرٹری محکمہ زرعی پیداوار اَتل ڈولو نے۲۴؍ اپریل سے۳۱؍ اگست ۲۰۲۳ کے درمیان منعقد ہونے والے تربیتی پروگرام کی تفصیلی پیشکش کی۔
کمشنر سیکرٹری پبلک گریوینسز محترمہ ریحانہ بتول نے ایل جی ملاقات کی نظامت کے فرائض اَنجام دی۔