بانڈی پورہ میں۲ لائن مین کرنٹ لگنے سے جھلس گئے

سرینگر//
کشمیر پاور ڈسٹری بیوشن کارپوریشن لمیٹڈ (کے پی ڈی سی ایل) کے دو لائن مین اتوار کی دیر شام شمالی کشمیر کے ضلع بانڈی پورہ میں پنزیگام ریسیونگ اسٹیشن پر بجلی کا جھٹکا لگنے سے زخمی ہو گئے۔
کشمیر نیوز سروس ( کے این ایس ) کے مطابق ایک اہلکار نے بتایا کہ یہ دونوں ریسیونگ اسٹیشن پر ہائی وولٹیج بجلی کی لائن کی مرمت کے دوران کرنٹ لگنے سے شدید زخمی ہو گئے۔
اہلکار نے بتایا ’’زخمیوں کو علاج کے لیے ضلع اسپتال بانڈی پورہ لے جایا گیا‘‘۔اسپتال میں موجود ایک سینئر ڈاکٹر نے بتایا کہ دونوں کو جھلسنے کے زخموں کے ساتھ لایا گیا تھا اور ابتدائی علاج کے بعد انہیں مزید علاج کیلئے سرینگر کے اسپتال منتقل کیا گیا تھا۔
ڈاکٹر نے ان کی شناخت ملنگم کے فاروق احمد اور قاضی پورہ کے عاشق حسین کے طور پر کی۔ انہوں نے کہا کہ ان کی حالت مستحکم ہے۔