اقتدار نہ ہونے کی وجہ سے اپوزیشن جماعتیں تلملا اٹھی ہیں

سرینگر//
جموںکشمیر بھارتیہ جنتا پارٹی( بی جے پی) کے صدر‘ رویندر رینا نے اپوزیشن پارٹیوں کی جانب سے الیکشن کمیشن آف انڈیا کے ساتھ ملاقات کرنے پر تنقید کرتے ہوئے کہاکہ یہ اْن کی مایوسی کو ظاہر کررہا ہے۔
رینا نے کہاکہ جموں وکشمیر کے کچھ سیاستدان ہمیشہ اقتدار سے چمٹنے کی کوشش کرتے ہیں آج جب اْن کے پاس اقتدار نہیں وہ تلملا اْٹھے ہیں۔
ان باتوں کا اظہار بی جے پی یونٹ صدر نے جموں میں نامہ نگاروں سے بات چیت کے دوران کیا۔
رینا نے کہاکہ الیکشن کمیشن آف انڈیا نے کچھ روز قبل ہی واضح کیا تھا کہ ای سی کا ایک اعلیٰ سطحی وفد بہت جلد جموں وکشمیر کا دورہ کرکے حالات کا جائزہ لے گا۔انہوں نے بتایا کہ چناؤ کمیشن نے کہاکہ سراغ رساں ایجنسیوں ‘ پولیس ، فوج اور دیگر اداروں کے ساتھ حالات کا جائزہ لینے کے بعدہی اس حوالے سے کوئی فیصلہ لیا جاسکتا ہے۔
بی جے پی کے یونٹ صدر کے مطابق جب الیکشن کمیشن نے جموںکشمیر کا دورہ کرنے کی بات کہی ہے تو اپوزیشن پارٹیوں کو دہلی جانے کی کیا ضرورت پڑی۔
رینا نے کہاکہ جموں کشمیر کے کچھ سیاستدان ہمیشہ اقتدار میں رہنا چاہتے ہیں‘آج جب ان کے پاس سرکار نہیں وہ پریشان ہو گئے ہیں۔انہوں نے مزید بتایا کہ جمہوری نظام میں عوام طاقت کا سر چشمہ ہوتا ہے لیکن کچھ لوگ ہیں جو اقتدار کے بغیر ذہنی کوفت کا شکارہ ہو گئے اور ایسے میں وہ کھبی ایک تو کھبی دوسرا دروازہ کھٹکھٹاتے ہیں۔