حج۲۰۲۳:’یو ٹی سے دس ہزار لوگ حج کی سعادت حاصل کر سکتے ہیں‘

سرینگر///
جموں کشمیر حج کمیٹی کی چیئر پرسن‘ سفینہ بیگ نے کہا ہے کہ امسال یو ٹی سے دس ہزار لوگ حج کی سعادت حاصل کر سکتے ہیں ۔
سرینگر میں ہفتے کے روز ایک پریس کانفرنس کے دوران بیگ نے کہا کہ اس مرتبہ گزشتہ برس کے مقابلے میں حج سستا کیا گیا ہے اور امید ہے جموں و کشمیر سے اس سال تقریباً ۱۰؍ ہزار عازمین سفر محمود پر جائیگا۔
جموںکشمیر حج کمیٹی کی چیئرسن نے کہا کہ فارم آن لائن اب دستیاب ہوگے وہ بھی بالکل مفت۔ایسے میں عازم کو حج ہاوس میں فارم جمع کرنے کے بجائے آن لائن فارم جمع کرنے ہوں گے۔
بیگ نے کہا کہ اب وہ عازم بھی دوبارہ حج کے لیے اہل ہوں گے جنہوں نے خود حج تو کیا ہوگا لیکن اہلیہ کے ساتھ پھر سے جانے کی خواہش رکھتے ہوں۔انہوں نے کہا یہ ایک اہم اور مثبت اقدام ہے۔اس کے علاوہ انہوں نے کہا اس مرتبہ بھی ۷۰ برس سے زائد عمر کے افراد میں قرعہ اندازی نہیں ہوگی۔
پریس کانفرنس سے خطاب کے دوران انہوں نے مزید کہا کہ بنا محرم کے بھی چار خواتین گروپ کی صورت میں بیت اللہ زیارت کے لیے اب جاسکتے ہیں۔ بیگ نے حج ۲۰۲۳ کے تعلق سے حج کمیٹی آف انڈیا کے ساتھ کی گئی تیاریوں، کوٹے اور سہولیات کے تعلق سے ایک اہم اور خصوصی میٹنگ میں لیے گئے کئی فیصلوں کا بھی تذکرہ کیا۔
حج کمیٹی کی چیئر پرسن نے کہا کہ میٹنگ میں وی آئی پی کوٹہ ختم کرنے کا بھی اعلان کر دیا گیا ہے اور اس خاص کوٹے کے تحت سفارش کی بنیاد پر پانچ سے دس افراد حج پر جاسکتے تھے۔ایسے میں وی آئی پی کوٹے کو ہی ختم کرنے کا فیصلہ کیا گیا۔ اب اس کوٹے کے تحت بیت اللہ پر کوئی نہیں جاسکتا ہے اور اس اہم اقدام سے حج کی خواہش رکھنے والے عام عازمین کو فائدہ ہوگا۔
قابل ذکر ہے کہ حج کمیٹی آف انڈیا اور سعودی حکومت کے درمیان مکمل بات چیت کے بعد یہ فیصلہ کیا گیا کہ بھارت سے حج ۲۰۲۳ کے لیے ایک لاکھ۷۵ ہزار سے زائد عازمین حج کا مقدس فریضہ ادا کریں گے،جس میں جموں و کشمیر کے تقریباً ۱۰ ہزار عازمین بھی شامل ہونگے۔
حال ہی میں حج کمیٹی آف انڈیا نے حج۲۰۲۳ کی پالیسی کا اعلان کیا ہے۔ حج کمیٹی آف انڈیا نے کہا ہے کہ امسال حج بیت اللہ جانے کے لیے ۲۵؍ایمبارکمنٹ پوائنٹس ہوں گے جبکہ حج کے درخواست فارم ویب سائٹ پر دستیاب ہوں گے۔
ایسے میں ہفتے کے روز جموں وکشمیر حج کمیٹی کی چیئرسن‘ سفینہ بیگ نے حج ۲۰۲۳ کی پالیسی اور اس میں لائی گئی اہم تبدیلوں اور دیگر اٹھائے گئے اقدامات کے تعلق سے میڈیا کو جانکاری دی۔