’پلوامہ کا طالب علم جنگجوؤں کی صفوں میں شامل نہیں ہوا ہے ‘

سرینگر//
پولیس نے پیر کو پلوامہ کے ایک نوجوان کے جنگجوؤں کی صفوں میں شامل ہونے کی رپورٹ کو مسترد کیا۔
ایک پولیس ترجمان نے اپنے ایک بیان میں کہا کہ پلوامہ کے مرن علاقے سے تعلق رکھنے والے گوہر نبی ولد غلام نبی نامی ایک طالب علم کی تصویر سوشل میڈیا پلیٹ فارمز پر وائرل کی گئی اور یہ دعویٰ کیا گیا کہ وہ جنگجوؤں کی صفوں میں شامل ہوا ہے ۔
ترجمان نے کہا کہ تحقیقات کے دوران معلوم ہوا کہ مذکورہ نوجوان کسی جنگجو تنظیم میں شامل نہیں ہوا ہے بلکہ وہ بھٹنڈہ پنجاب میں بی ایس سی کارڈیالوجی کی تعلیم حاصل کر رہا ہے ۔
پولیس بیان میں کہا گیا کہ مذکورہ طالب علم نے خود بھی ایک ویڈیو کلپ ریکارڈ کی ہے جس میں انہوں نے ان دعوؤں کی تردید کی ہے ۔
ترجمان نے کہا کہ پلوامہ پولیس نے اس ضمن میں تحقیقات شروع کی ہے تاکہ ان لوگوں کی شناخت اور گرفتاری عمل میں لائی جا سکے جنہوں نے مذکورہ نوجوان کی تصویر سوشل میڈیا پلیٹ فارمز پر وائرل کرکے اس پر جھوٹا الزام عائد کیا ہے ۔
پولیس نے کہا کہ پولیس نے شر پسندوں کومتنبہ کرتی ہے کہ اس نوعیت کا اشتعال انگیز مواد شیئر کرنے سے گریز کریں۔