ملک کو جوڑنے کا کام تومودی جی کر رہے ہیں

جموں//
جموںکشمیر بھارتیہ جنتا پارٹی(بی جے پی)یونٹ کے صدر ‘رویندر رینا نے کہاکہ کانگریس نے ہی جموں کشمیر کا بیڑا غرق کیا۔
رینا نے کہاکہ راہول گاندھی سے جموںکشمیر کے لوگ سوال کر رہے ہیں کہ یہاں پر ملی ٹینسی کو کس نے فروغ دیا ، لداخ ، پاکستانی زیر قبضہ کشمیر، اکسائی چن، گلگت بلتستان کو کس نے پاکستان اور چین کے حوالے کیا ۔ اس کا کانگریس اور راہول گاندھی کو جوب دینا ہی پڑے گا ۔
ان باتوں کا اظہاربی جے پی یونٹ صدرنے جموں میں ایک پر ہجوم پریس کانفرنس کے دوران کیا۔
رینا نے کہاکہ جموں کشمیر میں امن و امان کے قیام کی خاطر موجودہ مرکزی حکومت زمینی سطح پر کام کر رہی ہے۔انہوں نے کہاکہ جموںکشمیر کے سبھی طبقوں کو انصاف فراہم کرنے کی خاطر موجودہ حکومت کوشاں ہے ۔اُن کے مطابق کانگریس نے جموں وکشمیر کا بیڑ ا غرق کیا ۔
بی جے پی یونٹ صدرنے کہاکہ آج راہول گاندھی بھارت جوڑو یاترا پر نکلا ہے لیکن جموںکشمیر کے لوگ اُن سے سوال کر رہے ہیں کہ جموں کشمیر میں حالات کو درہم برہم کرنے کے پیچھے کس کا ہاتھ ہے ؟
رینا نے کہاکہ کانگریس نے جموں کشمیر کو ہر ایک شعبے میں پیچھے رکھا اور لوگوں کے حقوق سلب کئے ۔
بی جے پی کے یونٹ صدر نے راہو ل گاندھی سے سوال کیا کہ سال ۱۹۴۷میں ملک کیوں ٹوٹا ، یونین ٹریٹری لداخ میں گلگت بلتستان، اکسائی چن اور پاکستانی زیر قبضہ کشمیر کو کس نے چین اور پاکستان کے حوالے کیا؟انہوں نے الزام لگایا کہ کانگریس لیڈر شپ نے ہی چین اور پاکستان کو اراضی فراہم کی ۔
رینا نے کہاکہ جموں وکشمیر میں ملی ٹینسی کو کیسے فروغ ملا یہ راہول گاندھی سے پوچھا جاسکتا ہے کیونکہ۴۰برسوں تک کانگریس نے جموں وکشمیر اور ملک میں حکومت کی۔انہوں نے کہاکہ کانگریس نے ہمیشہ ملی ٹینسی کے حوالے سے نرم گوشہ رکھا جس وجہ سے یہاں بے گناہ لوگ مارے گئے ۔
بی جے پی کے یونٹ صدرنے کہاکہ جموںکشمیر کو برباد کرنے کا کام کانگریس نے کیا ہے ۔اُن کے مطابق موجودہ سرکار سب کا ساتھ‘ سب کا وشواس کو دھیان میں رکھ کر کام کر رہی ہے ۔انہوں نے مزید بتایا کہ ملک کو جوڑنے کاکام مودی جی کر رہے ہیں اور راہول گاندھی ملک کو توڑنے کی خاطر یاترا پر نکلا ہے ۔