اننت ناگ میں بارہویں جماعت کے طالب علم کی’ خود کشی‘

سرینگر///
جنوبی کشمیر کے ضلع اننت ناگ میں ایک۲۰سالہ نوجوان نے مبینہ طور پر خود کشی کرکے اپنا کام تمام کر دیا۔
ذرائع نے بتایا کہ اننت ناگ کے اتراسو خانی پورہ میں ایک نوجوان نے اپنے ہی گھر میں اپنے آپ کو پھانسی دے کر اپنی زندگی کا خاتمہ کر دیا۔
متوفی نوجوان کی شناخت۲۰سالہ اظہر بشیر ولد بشیر احمد بٹ کے بطور ہوئی ہے جو بارہویں جماعت کا طالب علم تھا۔
دریں اثنا پولیس نے اس سلسلے میں ایک کیس درج کرکے تحقیقات شروع کی ہیں۔
قابل ذکر ہے کہ وادی میں خود کشی کے واقعات میں اضافہ دیکھنے کو مل رہا ہے جس سے لوگوں میں تشویش کی ایک لہر دوڑ گئی ہے ۔
گرچہ خودکشی کرنے کی وجوہات مختلف ہوتی ہیں تاہم قریب ایک ماہ قبل جب سوپور کی ایک بچی نے غربت سے تنگ آکر دریائے جہلم میں چھلانگ لگا کر اپنی زندگی کا خاتمہ کر دیا تو اس سے پوری وادی سکتے میں آگئی۔