سرحدوں پر سکون ہے‘ البتہ دراندازی کی کوششیں جاری ہیں : ڈی جی بی ایس ایف

بڈگام//
باڈر سکیورٹی فورسز(بی ایس ایف) کے کے ڈائریکٹر جنرل‘پنکج کمار سنگھ نے کہا ہے کہ جموں کشمیر میں سرحدیں پر سکون ہیں البتہ دراندازی کی کوششیں جاری ہیں۔
پیر کو وسطی کشمیر کے ضلع بڈگام کے ہمہامہ میں آج بی ایس ایف کے زیر اہتمام نئے بھرتی ہونے والے کیڈٹس کی پاسنگ آؤٹ پریڈ کے حاشیہ پر ڈائریکٹر جنرل بی ایس ایف پنکج کمار سنگھ نے میڈیا سے بات کرتے ہوئے کہا کہ کنٹرول لائن پر صورتحال پرامن ہے، کیونکہ جنگ بندی دونوں جانب سے جاری ہے۔
سنگھ نے کہا کہ فوج اور بی ایس ایف جموں و کشمیر میں شاندار کام کر رہی ہیں اور مجھے پورا یقین ہے کہ وہ سرحدوں کی اچھی طرح حفاظت کر رہے ہیں۔
دراندازی کے سوال کے جواب میں موصوف نے کہا کہ درانداز اس بار آنے کی کوشش میں ہوتے ہیں لیکن سرحدوں کی حفاظت کے لیے وہاں موجود بی ایس ایف اہلکار اور فوج کے جوان ان کی اس کوشش کو کامیاب ہونے نہیں دیں گے اور پی ایس ایف کی کوشش ہے کہ درانداز ملک میں نہ آئیں۔
ڈی جی بی ایس ایف پنکج سنگھ نے کہا کہ کچھ شرپسند عناصر ہمیشہ کشمیر میں امن کو خراب کرنے کی کوشش کرتے ہیں لیکن ہم ان عناصر کا مقابلہ کرنے کے لیے ہمیشہ تیار ہیں۔