منفی ۲ء۴:چلہ کلان کے شروع ہوتے ہی سرینگر میں رواں سیزن کی سرد ترین رات ریکارڈ

سرینگر//
وادی کشمیر میں سردیوں کے بادشاہ چلہ کلان نے تخت نشین ہوتے ہی اپنے تیکھے تیور دکھاتے ہوئے سردیوں کے زور کو تیز تر کر دیا۔
محکمہ موسمیات کے ایک ترجمان کے مطابق سرینگر میں رواں سیزن کی اب تک کی سرد ترین رات ریکارڈ ہوئی جب شبانہ درجہ حرارت منفی ۲ء۴ڈگری سیٹی گریڈ ریکارڈ کیا گیا۔
قبل ازیں سرینگر میں۱۶دسمبر کو سرد ترین رات ریکارڈ ہوئی تھی جب کم سے کم درجہ حرارت منفی۶ء۳ڈگری سینٹی گریڈ ریکارڈ ہوا تھا۔
سیاحتی مقام گلمرگ میں کم سے کم درجہ حرارت منفی۶ء۴ ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۰ء۴ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت منفی۲ء۶ ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۴ء۵ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت منفی۴ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۹ء۳ڈگری سینٹی گریڈ ریکارڈ ہوا تھا۔
قصبہ قاضی گنڈ میں کم سے کم درجہ حرارت منفی۲ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت منفی۶ء۳ڈگری سینٹی گریڈ ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت منفی۸ء۱۱ڈگری سینٹی گریڈ ریکارڈ کیا گیا جبکہ ضلع کرگل میں منفی۱ء۱۲ڈگری سینٹی گریڈ ریکارڈ ہوا ہے ۔
محکمہ موسمیات کے مطابق وادی میں ماہ رواں کے اختتام تک موسم خشک رہنے کا امکان ہے تاہم اس دوران۲۶دسمبر کو موسم کروٹ بدل کر بالائی علاقوں میں کہیں کہیں ہلکی برف باری کا باعث بن سکتا ہے ۔
دریں اثنا وادی میں بدھ کو چلہ کلان کے پہلے روز موسم نہ صرف خشک رہا بلکہ ہلکی دھوپ بھی چھائی رہی جس سے لوگوں کو دکان تھڑوں، پارکوں وغیرہ میں لطف اندوز ہوتے ہوئے دیکھا گیا۔