پلوامہ میں دوسرے کا اے ٹی ایم کارڈ استعمال کرکے پیسہ نکالنے والا گرفتار:پولیس

سرینگر/
پولیس نے اے ٹی ایم کارڈ مشین سے مبینہ طور پر دوسرے کا اے ٹی ایم کارڈ استعمال کرکے پیسے نکالنے کے الزام میں ایک اے ٹی ایم گارڈ کو گرفتار کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن راج پورہ کو۱۴نومبر کو محمد یوسف ڈار ولد عبدالغنی ڈار ساکن تجن نامی ایک شخص کی طرف سے ایک تحریری شکایت موصول ہوئی جس میں کہا گیا کہ اس کے۲۸ہزار روپیے چوری ہوئے یا کسی نامعلوم شخص کے ذریعے اس کے اکاؤنٹ سے نکالے گئے ۔
بیان میں کہا گیا کہ شکایت موصول ہونے پر ایک کیس درج کیا گیا اور اس ضمن میں تحقیقات شروع کی گئیں جس کے لئے ایک خصوصی ٹیم تشکیل دی گئی۔
ترجمان نے کہا کہ تحقیقات کے دوران تکنیکی وسائل کی مدد سے یہ بات سامنے آئی کہ ملزم نے نقاب لگا کر شکایت کنندہ کا اے ٹی ایم کارڈ استعمال کرکے ڈلی پورہ میں اے ٹی ایم مشین سے یہ رقم نکالی ہے ۔
بیان میں کہا گیا’’مزید تحقیقات سے ملزم کی شناخت شبیر احمد پوسوال (جو پکھر پورہ اے ٹی ایم میشن پر تعینات اے ٹی ایم گارڈ ہے ) ولد محمد قاسم پوسوال ساکن سونہ بنجر راج پور کے بطور ہوئی ہے ‘‘۔
پولیس ترجمان نے کہا کہ ملزم کو پوچھ تاچھ کیلئے طلب کیا گیا جس دوران اس نے جرم کا اعتراف کیا۔انہوں نے کہا’’ملزم کے انکشاف پر ۲۸ہزار روپیے نقدی اور چار مختلف گاہکوں کے چار اے ٹی ایم کارڈ بر آمد کئے گئے ‘‘۔
بیان کے مطابق اس ضمن میں مزید تحقیقات جاری ہے ۔