کانگریس راہول کی قیادت میں ملک کو غیر بی جے پی کی حکومت دے گی:کھرگے

سرینگر//
ملکارجن کھرگے نے منگل کو کانگریس صدر بننے کے بعد اپنے پہلے عوامی خطاب میں کہا کہ کانگریس راہول گاندھی کی قیادت میں ملک کو غیر بھارتیہ جنتا پارٹی کی حکومت دے گی۔
پارٹی کے اعلیٰ عہدے پر منتخب ہونے کے بعد پہلی بار حیدرآباد میں’ بھارت جوڑو یاترا‘ میں شامل ہوتے ہوئے‘ کھرگے نے وزیر اعظم نریندر مودی پر سخت حملہ کرتے ہوئے کہا کہ ہماچل پردیش کے انتخابات کے شیڈول کا اعلان کیا گیا تھا لیکن گجرات کا نہیں تاکہ وزیر اعظم گجرات کے موربی میں گرنے والے پل جیسے مزید پلوںکا افتتاح کر سکیں۔
کانگریسی صدر نے تلنگانہ کے چیف منسٹر کے چندر شیکھر راؤ پر بھی تنقید کی اور کہا کہ وہ پارلیمنٹ میں اہم بلوں پر بھارتیہ جنتا پارٹی کی حمایت کرتے ہوئے اپوزیشن جماعتوں تک پہنچ رہے ہیں۔
کھرگے نے تلنگانہ کے وزیر اعلیٰ کی ممتا بنرجی اور دیگر غیر کانگریسی قائدین تک رسائی کی کوششوں کا حوالہ دیتے ہوئے کہا’’کے سی آر دوسری ریاستوں میں جا رہے ہیں اور لوگوں سے مل رہے ہیں، وہ کولکتہ گئے، پھر پنجاب اور تمل ناڈو گئے‘‘۔
کنیا کماری سے کشمیر تک جو پارٹی زندہ ہے اسے کمزور کرنے کے بجائے پہلے اپنے گھر کی دیکھ بھال کرو، لڑنے کیلئے تیار ہے۔‘‘