جے شنکر نے بمسٹیک میں لیا حصہ ، دہشت گردی سمیت کئی امور پر ہوئی بات چیت

کولمبو/نئی دہلی/۲۹مارچ
وزیر خارجہ ایس جے شنکر نے منگل کو کولمبو میں ۱۸ویں ملٹی سیکٹرل ٹیکنیکل اینڈ اکنامک کوآپریشن انیشیٹو (بمسٹیک ) کی وزارتی میٹنگ میں شرکت کی اور دیگر امور کے ساتھ دہشت گردی، پرتشدد انتہا پسندی اور سائبر حملوں سے نمٹنے کے اجتماعی طریقوں پر تبادلہ خیال کیا۔
ڈاکٹر جے شنکر نے مہمان نوازی کے لیے اپنے سری لنکن ہم منصب جی ایل پیرس کا شکریہ ادا کرنے کے بعد ٹویٹ کیا’’ہم نے خاص طور پر کنکٹی وتی ، توانائی اور سمندری تعاون کے شعبوں میں شدت اور توسیع کے لیے اپنے عزم پر زور دیا۔ اس مقصد کے لیے ہم فعال کاروباری تعاون اور مشترکہ پروجیکٹوں کی حوصلہ افزائی کریں گے ‘‘۔
وزیر خارجہ نے اہم امور کے طور پر بندرگاہ کی سہولیات، فیری خدمات، ساحلی جہاز رانی، گرڈ کنیکٹی وٹی اور موٹر گاڑیوں کی نقل و حرکت پر تعاون کا بھی ذکر کیا۔ انہوں نے کہا ’’ دہشت گردی، پرتشدد انتہا پسندی، بین الاقوامی جرائم، سائبر حملوں اور منشیات کی اسمگلنگ کا مقابلہ اجتماعی طور پر کرنا چاہیے ۔ ہم کل سربراہی اجلاس میں اپنے چارٹر اور ماسٹر پلان کو اپنانے کے منتظر ہیں‘‘۔
واضح رہے کہ بمسٹیک ایک علاقائی کثیرالجہتی تنظیم ہے ۔ اس کے اراکین میں خلیج بنگال کے ساحل اور ملحقہ علاقے کے ممالک ہیں اور ان میں بنگلہ دیش، بھوٹان، ہندوستنا ، نیپال، سری لنکا، میانمار اور تھائی لینڈ شامل ہیں۔