نتیش کمار کی سیکورٹی توڑ کر ایک شخص نے مارا گھونسا، ڈی جی پی کٹہرے میں!

بہار کے بختیار پور میں وزیر اعلیٰ نتیش کمار کی سیکورٹی توڑے جانے کا معاملہ 27 مارچ کو سامنے آیا تھا، جس کے بعد ڈی جی پی کو کٹہرے میں کھڑا کر دیا گیا ہے۔ نتیش کمار کی سیکورٹی توڑ کر انھیں گھونسا مارے جانے کے واقعہ کے ایک دن بعد آر جے ڈی لیڈروں نے پیر کے روز بہار کے پولیس ڈائریکٹر جنرل (ڈی جی پی) ایس کے سنگھل کو برخاست کرنے کا مطالبہ کیا ہے۔ آر جے ڈی رکن اسمبلی للت یادو نے پیر کے روز اسمبلی میں سیکورٹی توڑے جانے کا ایشو اٹھایا۔ انھوں نے کہا کہ اگر وزیر اعلیٰ ریاست میں محفوظ نہیں ہیں، تو ہم کیسے امید کریں کہ ریاست کے عام لوگ محفوظ رہیں گے۔للت یادو نے کہا کہ ’’یہ ایک سنگین سیکورٹی چوک ہے۔ ہمارے وزیر اعلیٰ کی سیکورٹی سے پوری طرح سے سمجھوتہ کیا گیا ہے۔ اگر ہم اپنے وزیر اعلیٰ کی حفاظت نہیں کرتے ہیں تو اسپیشل برانچ اور ڈی جی پی کی حقیقت کیا ہوگی۔ اس لیے ہم نے ڈی جی پی سنجیو کمار سنگھل کو برخاست کرنے کا مطالبہ کیا ہے۔‘‘
اسمبلی میں ان کے دلائل کے بعد اسپیکر وجے سنہا نے بھی اس معاملے پر اظہار فکر کیا۔ انھوں نے نائب وزیر اعلیٰ تارکشور پرساد سے ایوان کو واقعہ کی جانکاری دینے کو کہا۔ انھوں نے بھی واقعہ پر فکر ظاہر کرتے ہوئے کہا کہ یہ بہت افسوسناک ہے۔ انھوں نے کہا کہ ریاستی حکومت حالات کا جائزہ لے رہی ہے اور مستقبل میں ایسے واقعات دوبارہ نہ ہوں، اس سے بچنے کے لیے اقدام کیے جا رہے ہیں۔ حالانکہ اپوزیشن لیڈر نائب وزیر اعلیٰ کے جواب سے مطمئن نہیں ہوئے اور انھوں نے نعرے بازی شروع کر دی۔ غور طلب ہے کہ اتوار کے روز وزیر اعلیٰ نتیش کمار پٹنہ سے ملحق بختیار پور بازار میں مجاہد آزادی اور سماجی کارکن پنڈت شیل بھدر یاجی کے مجسمہ پر خراج عقیدت پیش کرنے پہنچے تھے۔ وہ جیسے ہی مجسمہ کے پاس پہنچے ایک ذہنی طور پر معذور شخص شنکر کمار ورما عرف چھوٹو سیکورٹی توڑ کر وہاں پہنچ گیا اور نتیش کمار کو پیچھے سے ایک گھونسا مار دیا۔ بعد ازاں سیکورٹی اہلکاروں نے اسے پکڑ لیا اور حراست میں لے لیا۔
حالانکہ واقعہ کے بعد وزیر اعلیٰ نے سیکورٹی اہلکاروں سے حملہ آور شنکر ورما کے خلاف کارروائی نہیں کرنے کو کہا۔ انھوں نے سیکورٹی اہلکاروں سے اس مسئلہ کا حل نکالنے کو بھی کہا اور ساتھ ہی اس کا علاج کرانے کو بھی کہا ہے۔ اس درمیان بختیار پور کے کاروباریوں نے شہر کو بند کرنے کا فیصلہ کیا۔ انھوں نے کالے ریبن پہن کر بازار میں وزیر اعلیٰ کے تئیں احترام کا اظہار کرنے کے لیے احتجاجی مارچ بھی نکالا۔