بہار میں سیاسی طوفان! مکیش سہنی کی نتیش کابینہ سے ہو گئی چھٹی

بہار میں ایک نئی سیاسی ہلچل اس وقت دیکھنے کو ملی جب وکاس شیل انسان پارٹی (وی آئی پی) کے قومی صدر مکیش سہنی کی نتیش کمار کابینہ سے چھٹی کر دی گئی۔ اتوار کو ہی وزیر اعلیٰ نتیش کمار نے مکیش سہنی کو اپنی کابینہ سے ہٹانے کی سفارش کی تھی، جس کو 28 مارچ کو گورنر نے منظوری دے دی۔ اس کے ساتھ ہی کابینہ سکریٹریٹ نے اس سلسلے میں نوٹیفکیشن بھی جاری کر دیا ہے۔
موصولہ اطلاعات کے مطابق بی جے پی کی سفارش پر ہی مکیش سہنی کو نتیش کابینہ میں جگہ ملی تھی، اور اب انھیں ہٹانے کے لیے بی جے پی کی طرف سے وزیر اعلیٰ نتیش کمار کو خط لکھا گیا۔ بہار بی جے پی صدر سنجے جیسوال اور بی جے پی قانون ساز پارٹی لیڈر اور نائب وزیر اعلیٰ تارکشور پرساد نے خط بھیج کر وزیر اعلیٰ سے گزارش کی کہ وی آئی پی کے تینوں اراکین اسمبلی اب بی جے پی کا حصہ ہیں۔ ان کا بی جے پی قانون ساز پارٹی میں انضمام ہو چکا ہے۔ اس لیے اب وی آئی پی کے پاس کوئی رکن اسمبلی نہیں بچا ہے۔ ساتھ ہی اب وی آئی پی این ڈی اے کا حصہ نہیں ہے۔ اس لیے مکیش سہنی کو ذمہ داری سے سبکدوش کر دیا جائے۔ اس کے بعد وزیر اعلیٰ نتیش کمار نے انھیں ہٹانے کی سفارش گورنر سے کر دی تھی۔