اننت ناگ جھڑ پ میں۲جنگجو ہلاک:پولیس

سرینگر//
جنوبی کشمیر کے ٹینگہ پاوا اننت ناگ میں سیکورٹی فورسز اور جنگجوؤں کے مابین رات بھر جاری رہنے والی جھڑپ میں دو ملی ٹینٹ مارے گئے ۔
پولیس کے ایک ترجمان نے بتایا کہ جنوبی ضلع اننت ناگ کے ٹینگہ پاوا گاوں میں ملی ٹینٹوں کے چھپے ہونے کی ایک خاص اطلاع موصول ہونے کے بعد پولیس اور سیکورٹی فورسز نے اس علاقے کو درمیانی شب اپنے محاصرے میں لے کر اُنہیں ڈھونڈ نکالنے کیلئے گھر گھر تلاشی کارروائی کا آغاز کیا۔
ترجمان نے بتایا کہ خود کو سلامتی عملے کے گھیرے میں پا کر ملی ٹینٹوں نے اندھا دھند گولیاں برسا کر فرا ر ہونے کی بھر پور سعی کی تاہم حفاظتی عملے کی کارگر حکمت عملی نے اُنہیں فرار ہونے کا کوئی موقع فراہم نہیں کیا او ر اس طرح سے طرفین کے مابین جھڑپ شروع ہوئی۔
ترجمان کے مطابق رات بھر جاری رہنے والی اس جھڑپ میں دو جنگجو مارے گئے جن کی شناخت اور تنظیمی وابستگی کے بارے میں جانچ پڑتال شروع کی گئی ہے ۔انہوں نے بتایا کہ گاوں میں تلاشی آپریشن ہنوز جاری ہے
ایڈیشنل ڈائریکٹر جنرل آف پولیس (اے ڈی جی پی) کشمیر، وجے کمار نے کہا کہ مارے گئے ملی ٹینٹوں کا تعلق لشکر طیبہ (ایل ای ٹی) سے تھا۔انہوں نے کہا دونوں مختلف معاملات میں پولیس کو مطلوب تھے۔
فوج کے ایک ترجمان نے بتایا کہ فائرنگ کے تبادلے میں دو فوجی اور ایک فوجی کتا زخمی ہوا۔انہوں نے کہا کہ فوجیوں کو یہاں فوج کے ۹۲بیس ہسپتال منتقل کیا گیا اور ان کی حالت مستحکم ہے۔ترجمان نے کہا کہ تصادم کے مقام سے دو اے کے رائفلیں اور جنگی سامان برآمد کیا گیا ہے۔