ڈبلیو ایچ او الرٹ: گھبرانے کی ضرورت نہیں‘دوا صرف گیمبیا کیلئے تھی:اندرابی

سرینگر//
ڈپٹی ڈرگ کنٹرولر کشمیر ڈویڑن، نگہت اندرابی نے جمعہ کو کہا کہ لوگوں کو کھانسی کی پینے کی دوائی سے گھبرانے کی ضرورت نہیں ہے، جس کے بارے میں عالمی ادارہ صحت نے الرٹ جاری کیا تھا، کیونکہ یہ صرف گیمبیا کے لیے تیار کی گئی تھی۔
اندرابی نے کہا کہ چاروں مصنوعات کشمیر یا ہندوستان کے لیے تیار نہیں کی گئی تھیں، بلکہ وہ صرف گیمبیا کے لیے تیار کی گئی تھیں، اس لیے یہاں لوگوں کو گھبرانے کی کوئی وجہ نہیں ہے۔
ڈپٹی ڈرگ کنٹرولر کشمیر نے کہا کہ اس حوالے سے وہ پہلے ہی سرکلر جاری کر چکے ہیں اور ابھی تک ان کی ٹیموں کوکچھ نہیں ملا ہے۔’’پھر بھی ہم اس بات کا یقین کرنے کے لئے تمام مصنوعات کی جانچ کر رہے ہیں۔ لیکن ابھی کے لیے، گھبرانے کی ضرورت نہیں ہے۔‘‘
اندرابی نے یہ بھی کہا کہ افواہیں پھیلانے والے ہمیشہ موجود رہتے ہیں اور لوگوں کو ان پر کوئی دھیان نہیں دینا چاہئے۔
قبل ازیں، ڈپٹی ڈرگ کنٹرولر کشمیر نے تمام اسسٹنٹ ڈرگ کنٹرولرز سے ڈسٹری بیوشن چینلز سے فارمولیشنوں کی نشاندہی کرنے کے بعد فوری کارروائی کے لیے کہا تھا۔
ڈبلیو ایچ او نے ہندوستان میں میڈن فارماسیوٹیکلز کی طرف سے بنائے گئے کھانسی اور سردی کے چار سیرپ پر ایک الرٹ جاری کیا تھا، جس میں انتباہ کیا گیا تھا کہ ان کا تعلق گیمبیا میں ۶۶ بچوں کی موت سے ہو سکتا ہے۔