شوپیاں:۲۷ سرکاری ملازمین ڈیوٹی سے غیر حاضر پائے گئے

سرینگر//
ضلع مجسٹریٹ شوپیاں، سچن کمار ویشیا نے جمعہ کو سرکاری دفاتر کے اچانک معائنہ کے دوران میونسپل کمیٹی شوپیاں کے سات ملازمین اور آر اینڈ بی ڈویڑن شوپیاں کے ۲۰ ملازمین بشمول ایک سینئر افسر کو ڈیوٹی سے غیر حاضر پایا۔
ذرائع کے حوالے سے ایک مقامی خبر رساں ایجنسی نے اطلاع دی ہے کہ ویشیا نے ان کی غیر مجاز غیر حاضری کا سنجیدگی سے نوٹس لیتے ہوئے قواعد کے تحت غیر حاضرین کے خلاف سخت کارروائی کی سفارش کی ہے۔
ڈی ایم نے ان افسروں/ اہلکاروں سے وضاحتیں بھی طلب کیں‘جو معائنہ کے دوران غیر حاضر پائے گئے۔انہوں نے ملازمین کو مستقبل میں بھی وقت کی پابندی کرنے کی ہدایت کی اور کہا کہ اس طرح کے معائنے مستقبل میں بھی جاری رہیں گے اور غیر مجاز غیر حاضری کو برداشت نہیں کیا جائے گا۔