’گاڑی کتے‘:جو کپوارہ میں لائن آف کنٹرول کی حفاظت پر مامور فوج کی مدد کرتے ہیں

کیرن (ایل او سی)//
جموںکشمیر کے ضلع کپوارہ میں لائن آف کنٹرول پرتعینات فوجی جوان در اندازی کی کسی بھی کوشش کو ناکام بنانے کیلئے جہاں ایک طرف تمام تر جدید ترین ساز و سامان و سہولیات سے لیس ہیں وہیں دوسری طرف مقامی کتے بھی سرحد کی حفاطت کے لئے فوجی جوانوں کے شانہ بشانہ کام کر رہے ہیں۔
’گاڑی‘ کتوں کے نام سے مشہور یہ مخصوص کتے سرحد پر مشکوک نقل و حمل کو بانپتے ہی وہاں تعینات فوجی جوانوں کو الرٹ کر دیتے ہیں۔
یہ کتے مشینوں اور نگرانی کے دوسرے سامان سے بھی زیادہ پھرتی اور ہوشیاری کا مظاہرہ کرتے ہیں۔
کشمیر میں۳۵۰کلومیٹر طویل ناہموار پہاڑیوں، گھنے جنگلوں اور دشوار گذار راستوں پر محیط ایل او سی کے تحفظ کو یقینی بنانے کیلئے یہ کتے ایک اور طاقت کے بطور کام کرتے ہیں۔
کیرن سیکٹر میں اگلی چوکی پر تعینات ایک فوجی جوان نے یو این آئی کو بتایا’’یہاں کئی چوکیوں پر یہ کتے فوجی جوانوں کیلئے آنکھوں اور کانوں کی حیثیت رکھتے ہیں‘‘۔انہوں نے کہا’’اگر کوئی ایل او سی کے نزدیک آنے کی کوشش کرتا ہے تو یہ کتے شور مچاتے ہیں، یہ کتے عملی طور پر ہمارے ساتھ کام کرتے ہیں اور یہاں چوکیوں پر یہ ہمارا ایک حصہ ہیں‘‘۔
فوجی جوان کا کہنا تھا’’موسم کیسا بھی ہو برف باری ہو رہی ہو، تیز بارشیں ہو رہی ہوں یا ٹھٹھرتی سردی ہو یہ کتے ہر موسم میں جوانوں کے وفادار دوست ہیں‘‘۔انہوں نے مزید کہا’’اجنبی شخص کی نقل و حرکت دیکھتے ہی یہ طاقتور کتے زوروں سے بھونکنے لگتے ہیں اور جب فوجی جوان اپنے خیموں میں ہوتے ہیں تو اس وقت بھی یہ ادھر ادھر کڑی نظر گذر رکھتے ہیں‘‘۔
ایل او سی پر گرچہ اہم مقامات پر فوج کے تربیت یافتہ کئی کتے موجود ہوتے ہیں لیکن ’گاڑی کتوں‘کو کوئی تربیت نہیں دی جاتی ہے اور اس کے باوجود بھی یہ کتے فوجی جوانوں کیلئے انتہائی مدد گار ثابت ہوتے ہیں۔
ایک فوجی افسر نے یو این آئی کو بتایا’’ان کتوں کو کسی قسم کی کوئی تربیت نہیں دی جاتی ہے لیکن سرحد پر رہنے سے وہ یہاں کے ماحول کو پانپ لیتے ہیں اور انہیں یہ حس پیدا ہوجاتی ہے کون یہاں اپنا اور کون اجنبی ہے ‘‘۔
فوجی نے کہا کہ یہ کتے فوج کی گشتی پارٹیوں کا بھی حصہ ہوتے ہیں۔ان کا کہنا تھا’’یہ کتے چیک کرنے کیلئے ان جگہوں پر جاتے ہیں جہاں فوجی جوان تعینات ہوتے ہیں اور پھر واپس کمپنی کمانڈر کے پاس آتے ہیں تاکہ اس کو معلوم ہوسکے کہ ہر جوان اپنی اپنی منزل پر پہنچا ہے ‘‘۔
ایک اور فوجی جوان نے کہا کہ یہ کتے نہ صرف در اندازی کی روک تھام کیلئے اپنی ڈیوٹی انجام دیتے ہیں بلکہ ہمارے لئے بھی تفریح کا باعث بنتے ہیں۔انہوں نے کہا کہ ان کتوں کو بسکوٹ اور دوسری غذا دی جاتی ہے اور فوجی جوان ان کا خاص خیال رکھتے ہیں۔