شوپیاں سے تعلق رکھنے والے حاذق نے نیٹ یو جی امتحان میں ٹاپ کیا

سرینگر//
وادی کشمیر کے طلبا قومی سطح پر منعقد ہونے والے مسابقتی امتحانات میں مسلسل اپنی ذہانت و ذکاوت کا لوہا منوا کر وادی کا نام روشن کر رہے ہیں۔
جنوبی کشمیر کے ضلع شوپیاں سے تعلق رکھنے والے حاذق پرویز نے این ای ای ٹی، یو جی امتحان میں نہ صرف جموں و کشمیر میں ٹاپ کیا ہے بلکہ قومی سطح پر دسویں رینک حاصل کی ہے ۔
حاذق نے اس امتحان میں۷۲۰ میں۷۱۰پوائنٹس حاصل کرکے دسویں رینک حاصل کی ہے ۔
شوپیاں کے ٹرینز گاؤں کے حاذق کے والد پرویز احمد فروٹ تاجر ہیں اور ان کی والدہ گھریلو کام کرتی ہیں۔
حاذق اپنی اس شاندار کامیابی کا سہرا اپنے والدین اور اساتذہ کے سر ہی باندھتے ہیں۔ان کا کہنا ہے’’میں اللہ کا شکر گذار ہوں کہ جس نے مجھے کامیابی سے ہمکنار کیا لیکن میری یہ کامیابی میرے والدین اور ایک کوچنگ انسٹی ٹیوٹ کے اساتذہ کے سر ہے‘‘۔
کامیاب طالبعلم نے کہا’’میں نیٹ پاس کرنے کیلئے پر امید تھا لیکن دسویں رینک حاصل کرنا میری توقع سے باہر تھا‘‘۔
حاذق کا کہنا ہے کہ کامیابی کی سیڑھی پر چڑھنے کیلئے سخت محنت کے بغیر کوئی دسرا راستہ نہیں ہے ۔انہوں نے کہا’’مجھے بھی اپنے اس سفر خاص کر کورونا اور دیگر مسائل کی وجہ سے گونا گوں مشکلات کا سامنا کرنا پڑا‘‘۔
کامیاب طالب علم نے کہا کہ میں نیورولوجی میں مہارت حاصل کرنا چاہتا ہوں۔انہوں نے نیٹ امیدواروں سے حوصلے سے کام لے کر سخت محنت کرنے کی نصیحت کی۔
حاذق نے ڈولفن پبلک اسکول پلوامہ میں آٹھویں جماعت تک تعلیم حاصل کی اور اس کے بعد شاہ ہمدان پبلک اسکول شوپیاں میں داخلہ لیا۔انہوں نے دسویں جماعت کا امتحان پاس کرکے گورنمنٹ ہائر سکینڈری اسکول ترک وانگام شوپیاں میں داخلہ کیا اور وہیں سے گیارہویں اور بارہویں جماعتوں کے امتحانات پاس کئے ۔