اب ہمیں یقین ہے اور سو فصد ہے کہ ملک کشمیر میں بجلی سپلائی بہتر ہو جائیگی …یقین ایمان کی حد تک ہے ۔بجلی سپلائی میں بہتری اس لئے نہیں آ ئیگی کہ ایسا حکومت دعویٰ کررہی ہے… اس لئے بھی نہیں کہ پیداوار میں اضافہ ہو گیا ہے… نہیں صاحب اس لئے نہیں اور… اور بالکل بھی نہیں ۔ وجہ یہ ہے کہ ملک کشمیر میں سمارٹ بجلی میٹر لگنے کا سلسلہ شروع ہو گیا ہے اور … اور کچھ ایک علاقوں میں انہوں نے اپنا کام بھی شروع کردیا ہے … کام ؟ جی ہاں کام … کیسے کام؟لوگوں کے‘ صارفین کے دل دھڑکانے کا کام… جی ہاں یقین کیجئے کہ اب میٹر اتنا تیز نہیں دھڑکے گا… جتنا تیز صارفین کے دل…ان کی تمام نظریں اب میٹر پر لگی ہوں گی کہ … کہ انہوں نے کتنی بجلی استعمال کی ‘ کتنے پیسے چڑھ گئے اور … اور بیلنس کتنا رہ گیا ۔اب دوڈ شروع ہو گی ‘ افراد خانہ میں بجلی بچانے‘ اس کے منصفانہ استعمال کی دوڈ… اس دوڈ میں افراد خانہ آپس میں لڑ پڑیں گے اور… اور ایک دوسرے پر بجلی کے استعمال میں کفایت شعاری نہ برتنے کا الزام لگائیں گے… ایک دوسرے سے کہیں گے کہ تیری وجہ سے بل زیادہ آئیگی… تمہاری وجہ سے پیسے زیادہ چڑھ رہے ہیں اور… اور اگر میڑ پری پیڈ ہو تو… تو ٹیشن اور زیادہ بڑ ھ جائیگی اور … لڑائیاں بھی۔ کہ…کہ تیری وجہ سے سمارٹ میٹر کا بیلنس ختم ہو رہا ہے‘ کم ہو رہا ہے ۔اور پھر دھیرے دھیرے یہ لڑائیاں ‘ یہ تلخ کلامی‘ یہ توں توں میں میں کم ہوگی اور پھر بند کہ … کہ پھر ہم سب بجلی کا منصفانہ استعمال کرنا سیکھ گئے ہوں گے … جہاں بیٹھے نہ بھی ہوں وہاں بجلی آن رکھنے کی عادت بھول گئی ہو گی …۷x۲۴ تین تین چار چار گیزر آن رکھنے کی عادت نے خیر باد کہا ہو گا …ہکنگ‘یعنی تاریکیوں میں بجلی کی ترسیلی لائن پر چوری کا کنکشن حاصل کرنا قصہ پارینہ ہوا ہو گا اور… اور اس لئے ہو ا ہو گا کہ … کہ سمارٹ میٹروں کی تنصیب کے ساتھ ان سب بری عادات سے ہمیں خود کا پیچھا چھڑوانا ہو گا اور… اور سو فیصد ہو گا ۔اور یقین کیجئے کہ ایسا ہو گا اور… اور ایسا ہونے والا ہے … جس دن ہو گا اس دن ‘ اس لمحہ سے ہمیں دن رات اور رات دن بجلی ملنا شروع ہو جائیگا اور… اور یوں ہمارا وہ خواب پورا ہو جائیگا جس کے پورا ہونے کا ملک کشمیر کو اب بھی یقین نہیں ہے… اور بالکل بھی نہیں ہے ۔ لیکن یقین کیجئے کہ ایسا ہونے والا ہے ۔ ہے نا؟
اب بجلی سپلائی بہتر ہو گی !
